هەواڵی دڵخۆشکەر بۆ فەرمانبەران گەیشت

سەرۆكی شارەوانیی هەولێر رای گەیاند، ئەو شوێنانەی بۆ زەویی فەرمانبەران دیاری كراون، بە رێوشوێن بووە و جووتیارانیش قەرەبوو دەكرێنەوە.

ئەمڕۆ دووشەم 14ـی نیسان، كارزان عەبدولهادی سەرۆكی شارەوانیی هەولێر،  رایگەیاند، دیاریكردنی زەوییەكانی ناوچەی ئاشۆكان بۆ فەرمانبەران، بەپێی ماستەرپلانی ئامادەكراو بووە.

زیاتر گوتی، دڵنیایی بە فەرمانبەران دەدەین كە زەوییەكانیان وەردەگرن، هەروەها دڵنیاییش بە جووتیاران دەدەین مافەكانی خۆیان وەردەگرن بەپێی ئەو قەرەبووەی بە یاسا دیاری كراوە.

باسی لەوەش كرد، ئەوانەی گرێبەستی كشتوكاڵییان هەیە، 30% قەرەبوو دەكرێنەوە، ئەوانەی مافی رەفتاركردنیان هەیە، 12% قەرەبوو دەكرێنەوە، ئەوانەشی سەرف موڵكن، بە رێژی 20% قەرەبوو دەكرێنەوە، ئەو موڵكانەشی لەناو زەوییەكانیان هەیە، قەرەبووی ئەوەش وەردەگرن.

بە گوتەی سەرۆكی شارەوانی، تەنیا لە سنووری هەولێردا 60 هەزار زەوی وەردەگرن، ئێستە سێ‌ هەزار فەرمانبەر مامەڵە یاساییەكانیان بۆ ئەنجام دەدرێت كە زەوییان وەرگرتووە.