شەپۆلی باران بەڕێوەیە

کەشناسی هەرێمی کوردستان ڕایگەیاند، شەپۆلێکی بارانبارین ناوچەکەمان دەگرێتەوە.
بەڕێوەبەرایەتی گشتی کەشناسی و بوومەلەرزەزانی هەرێمی کوردستان ڕایگەیاند، ئەمڕۆ یەکشەممە، ناوچەکەمان بە گشتى نیمچە هەور دەبێت لەگەڵ ئەگەرى نمە باران لەسەر بەشێک لە ناوچە شاخاوییە سنوورییەکانى سنوورى پارێزگاى هەولێر و دهۆک.
سەبارەت بە سبەینێ دووشەممەش ڕایگەیاند، ئاسمانى هەرێم نیمچە هەور و هەندێک کات هەورى تەواو دەبێت لەگەڵ نمە باران لە هەندێک کات لە ناوچە جیاجیاکانى سنوورى پارێزگاى دهۆک و پاشان سنوورى پارێزگاى سلێمانى لەگەڵ هەورە تریشقە لە کاتى باران.
ئەوەشی خستەڕوو کە ئەگەرى کەمێک نمە باران لە ناوچە شاخاوییەکانى پارێزگاى هەولێر هەیە و لە درەنگانی سبەی شەودا شەپۆلێکى بارانبارین هەرێمی کوردستان دەگرێتەوە.
کەشناسی ڕاشیگەیاند، سبەینێ  پلەی گەرما لە سنوورى پارێزگاى هەولێر و دهۆک 2-3 پلە نزم دەبێتەوە، بەڵام لە سنوورى پارێزگاى سلێمانى و هەڵەبجە و کەرکووک بەرزدەبێتەوە .
بەرزترین پلەکانی گەرمای پێشبینیکراو بە پلەی سیلیزی
هەولێر : 20 پلەى سیلیزى
سلێمانى: 23 پلەى سیلیزى
دهۆک : 19 پلەى سیلیزى
زاخۆ : 18 پلەى سیلیزى
هەڵەبجە :24 پلەى سیلیزى
کەرکووک: 26 پلەى سیلیزى
سۆران : 18 پلەى سیلیزى
حاجی ئۆمەران: 15 پلەى سیلیزى
گەرمیان : 28 پلەى سیلیزى