بڕیارێک بۆ قۆتابخانەکان گەیشت

لە ناوەندەکانی خوێندن ڕێز لە شەهیدان و قوربانیانی ئەنفال دەگیرێت

وەزارەتی پەروەردەی حکومەتی هەرێمی کوردستان لە ڕاگەیاندراوێکدا کە ئاراستەی پەروەردەکانی کردووە، ئاماژەی بەوە کردووە، ڕۆژی دووشەممەی داهاتوو، 14ـی نیسانی 2025، لە ناوەندەکانی حکومەتی و نا حکوومەتی، بە ساتێک وەستان، ڕێز بۆ شەهیدان و قوربانیانی ئەنفال بنوێنن.

وەزارەتی پەروەردە لە ڕاگەیەندراوەکەیدا  ئاماژەی بەوە کردووە، بەمەبەستی ڕێز نواندن و بەرزڕاگرتنی یادی قوربانیانی گەلی کوردستان لە پرۆسەی تاوانکاری شاڵاوەکانی ئەنفال، لە ڕۆژی دووشەممە، ڕێککەوتی 14ـی نیسانی 2025،  لەگشت ناوەندەکانی خوێندنی حکومەتی و ناحکوومەتی، پێش دەستپێکی وانەی یەکەم، مەراسیمی ساتێک وەستان و ڕێز نواندن بۆ گیانی شەهیدان و قوربانیانی پرۆسەی ئەنفال ئەنجام بدرێت.

وەزارەتی پەروەردە  کارگێڕیی ناوەندەکانی خوێندنی ڕاسپاردووە، لەو ڕۆژەدا باس لەو تاوانانە بکەن کە بەرانبەر گەلەکەمان ئەنجام دراون .