مووچەی ئەو کەسانە گەیشت و دابەشدەکرێت

 مووچەی مانگی ئاداری مامۆستایانی گرێبەست دابەش دەکرێت و بەرپرسێکی ژمێریاریی پەروەردە و نوێنەرانی مامۆستایانیش وردەکارییەکەی ئاشکرا دەکەن.
بەرپرسێکی ژمێریاری لە وەزارەتی پەروەردەی حكوومەتی هەرێمی كوردستان، ڕایگەیاند: "بەهۆی نەبوونی سیولە، نەتواندرا پێش جەژن مووچەی مامۆستایانی گرێبەست دابەش بکرێ، بەڵام دارایی جەختیان کردووەتەوە، لەم چەند ڕۆژە دەدرێ."
 لای خۆیەوە، کارۆخ عەبدوڵا، نوێنەری مامۆستایانی گرێبەست  ڕایگەیاند: "لەگەڵ وەزارەتی دارایی قسەم کردووە، لەسەرەتای ئەم هەفتەیەدا مووچەی مانگی سێی مامۆستایانی گرێبەست دەدرێ، بەئەگەری زۆرەوە سبەی یان دووشەممە دابەش دەکرێ."
بەپێی لێدوانی فەرمی وەزارەتی دارایی، تەمویلی مووچەی مامۆستایانی گرێبەست لەسەر داهاتی ناوخۆی هەرێمی کوردستان خەرج دەکرێت.
کارۆخ عەبدوڵا، ئاماژەی بەوەش دا: "نەبوونی سیولەی پێویست و فشاری زۆری سەر گەنجینە و بانکەکان هۆکاری ئەوەبوون مووچەکە له پێش جەژن نەدرا."
جەختی کردەوە، وەزارەتی دارایی بەفەرمی وادەی دابەشکردنی مووچەی مانگی سێی مامۆستایانی گرێبەست بڵاو دەکاتەوە.
بەپێی ڕێنوێنیی دارایی، ئەو مامۆستایانەی هەڵگری بڕوانامەی دبلۆمن، 400 هەزار دیناریان بۆ خەرج دەکرێت و بۆ هەڵگرانی بڕوانامەی بەکالۆریۆسیش، 500 هەزار دینار خەرج دەکرێت.
مامۆستایانی پێشووی وانەبێژ، کە دواتر بە بڕیاری سەرۆکی حکوومەتی هەرێمی کوردستان کرانە گرێبەست، ژمارەیان 38 هەزار مامۆستایە.
ڕۆژی سێشەممە مووچەی مامۆستایانی گرێبەست دابەش دەکرێت.