هەواڵێکی خۆش بۆ هاوڵاتیانی هەولێر هات

بەهۆی كاركردن لە پڕۆژەی ئاوی ئیفراز، شەقامێكی ناو سەنتەری پارێزگای هەولێر بەشێوەیەكی كاتی و بۆ ماوەی 10 رۆژ دادەخرێت، داخستنەكەش لە ئەمڕۆوە دەست پێ دەكات.

ئەمڕۆ پێنجشەم سێی نیسان، بەپێی راگەیەنراوێكی هاتوچۆی هەولێر بەهۆی كاركردن لە پڕۆژەی ئاوی ئیفراز، شەقامی خزمەتگوزاریی 120 مەتری خێرا لە گەڕەكی 32ـی پارك نزیك كۆمپانیای opvi  گۆڕەپانی پشكنینی ئۆتۆمبێلی سەربە بەڕێوەبەرایەتیی هاتوچۆی هەولێر دادەخرێت.

داخستنەكە بۆ ماوەی 10 رۆژە و داوا لە شوفێران كراوە هاتوچۆ بەم شەقامەدا نەكەن و شەقامی جێگرەوە بەكار بهێنن، تا كاری هەڵكەندن و گواستنەوەی بۆڕیی ئاوەكە تەواو دەبێت و دوای تەواوبوونی، كاركردن شەقامەكە ئاسایی دەبێتەوە.

بەیەكەوە بەستنەوەی ئەو پڕۆژەیە لەگەڵ تۆڕەكانی ناو شار، بۆ یەكەمجارە بۆڕییەكانی گواستنەوەی ئاو داخلی ناو سەنتەری شاری هەولێر دەكرێت.

رابەر حوسێن بەڕێوەبەری ئاوی هەولێر، رایگەیاند، ئەو پڕۆژەیەی دانان و دابەشكردنی تۆڕی ئاوی ناوخۆ و بەستنەوەی بە هێڵە سەرەكییەكان، هەموو گەڕەكەكانی سنوورەكانی سەرۆكایەتیی شارەوانیی هەولێر، بەتایبەتی دەرەوەی شەقامی 120 مەتری و ناوەوەی شەقامەكە لێی سوودمەند دەبن و زیاتر لە هەزار بیری ئاویش دادەخرێن.

زیاتر گوتی، ئەو پڕۆژەیە گرنگییەكی یەكجار زۆری هەیە، ژمارەی ئەو ماڵانەی لێی سوودمەند دەبن 248 هەزار ماڵن، واتە هاوبەشی ئاو لەو پڕۆژەیەدا لە شاری هەولێر و دەوروبەری لێی سوودمەند دەبن كە 63 هەزار هاوبەشیان لە دەرەوەی شاری هەولێرن.

روونی كردەوە، پڕۆژەكە زۆر گەورەیە و درێژییەكەی 411 كیلۆمەترە، هەڵكەندن و بڕینی شەقامەكان و دانانی تۆڕی ئاو لەخۆ دەگرێت، هەروەها ئەم پڕۆژەیە لەلایەن بەڕێوەبەرایەتیی ئاوی هەولێر دیزاین كراوە و سەرپەرشتیی جێبەجێكردنی دەكرێت.
 
‏ لە مانگی ئەیلوولی ساڵی 2024 دا مەسروور بارزانی سەرۆكی حكوومەتی هەرێمی كوردستان، بەردی بناغەی پڕۆژەی فریاگوزاریی خێرای ئاوی هەولێری دانا، هەر ئەوكات فەرمانی كرد لەگەڵ گەیشتنی ئاو بە ناو شاری هەولێردا، پێویستە تۆڕە ناوخۆییەكانی ناو گەڕەكەكانی هەولێریش ئامادە بێت بۆ ئەوەی بەزوویی ئاوی پڕۆژەكە بگاتە ماڵان. ئێستەش بە فەرمانی مەسروور بارزانی، پڕۆژەی دانان و دابەشكردنی تۆڕی ناوخۆی ئاو بۆ گەڕەكەكانی هەولێر، بە گوژمەی 25 ملیار دینار لەسەر بودجەی وەبەرهێنانی وەزارەتی شارەوانی و گەشتوگوزار، لە ماوەی كەمتر لە ساڵێكدا لەلایەن كۆمپانیای كەیوەنەوە چووەتە بواری جێبەجێكردن.

لەم خشتەیەی خوارەوە بەشێكی زۆر لەو شوێنانەی سوودمەند دەبن لەم پڕۆژەیە، ڕوون كراوەتەوە كە دەكەونە سنووری سەرۆكایەتیی شارەوانیی هەولێر و بەڕێوەبەرایەتیی گشتیی شارەوانییەكانی هەولێر