وەزیری ناوخۆی کوردستان گەیشتە بەریتانیا

وه‌زاره‌تى ناوخۆى حكوومه‌تى هه‌رێمی كوردستان، بڵاوی كردووه‌ته‌وه‌، لەسەر داوەتنامەی فەرمی وەزارەتی ناوخۆی حکوومەتی بەریتانیا، ڕێبەر ئەحمەد، وەزیری ناوخۆی حکوومەتی هەرێمی کوردستان گەیشتە بەریتانیا بۆ بەشداریکردن لە لوتکەی ئاسایشی سنوور کە وەزیرانی ناوخۆ و داد و بەرپرسانی ئاسایشی سنووری
ژمارەیەکی زۆری وڵاتان بەشداری دەکەن.
به‌پێی ڕاگه‌یاندراوه‌كه‌وه‌، ئێوارەی رۆژی (یەکشەممە 30ی 3ى 2025)، لە ڕێورەسمی پێشوازی بۆنەکەدا، وه‌زیری ناوخۆى حكوومه‌تى هه‌رێمی كوردستان، چاویکەوت بە ییڤیت کوپەر، وەزیری ناوخۆی بەریتانیا و ژمارەیەک له‌ وەزیرانی داد و ناوخۆی وڵاتان وەکو وەزیری ناوخۆی حکوومەتی فیدراڵی عێراق، وەزیری ناوخۆی ئەڵمانیا، وەزیری کۆچی هۆڵەندا، وەزیری دادی سوید، وەزیری کۆچی چین،
وەزیری ناوخۆی بولگاریا، له‌گه‌ڵ ژمارەیەک وەزیر و بەرپرسانی پایەبەرزی سنوور و ئاسایشی وڵاتانی دیکە.
هه‌روه‌ها ئەمڕۆ (دووشەممە 31ى 3ى 2025) لوتکەی ئاسایشی سنوور بە فەرمی دەست بەکارەکانی دەکات و دوو رۆژ دەخایەنێت. لە رۆژی یەکەم، سەرۆک وەزیرانی بەریتانیا کییر ستارمەر، وتاری کردنەوەی لوتکەكه‌ پێشکەش دەکات و دواتر بەرنامەکانی لوتکە دەست پێ دەکات.
بڕیارە لە پانێڵی یەکەمدا کە وەزیری ناوخۆی بەریتانیا سەرپەرشتی دەکات، رێبەر ئەحمەد یەکێکە لە پانێلیستەکان و وتارێک پێشکەش
بکات.
به‌پێی زانیارییه‌كان، شاندەکانی زیاتر لە 40 وڵات ئه‌مڕۆ دووشەممە لە بەریتانیا کۆ دەبنەوە بۆ کۆبوونەوەیەکی لوتکە کە کییر ستارمەر، سەرۆکوەزیرانی بەریتانیا بەڕێوەی دەبات بۆ تاوتوێکردنی ڕێگاکانی بنبڕکردنی بازرگانی به‌ کۆچبەران.