شەپۆلێکی باران بەڕێوەیە

كەشناسیی هەرێمی كوردستان پێشبینیی بۆ رۆژی یەكشەم و دووشەم بڵاو كردەوە، بەپێی پێشبینییەكە، هەردوو رۆژەكە باران دەبارێت.

ئەمڕۆ شەموو 29ـی ئادار، كەشناسیی هەرێمی كوردستان پێشبینیی بۆ كەشوهەواری ڕۆژانی یەكشەم و دووشەم كە دەكاتە ڕۆژانی جەژنی رەمەزان، بڵاو كردەوە.

كەشناسی دەڵێت، پێشبینی دەكرێ ڕۆژی یەكشەم ئاسمانی هەرێم نیمچەهەور بۆ هەوری تەواو بێت، لەگەڵ هاتنی شەپۆلێكی نمەباران و هەورەتریشقەی پچڕپچڕ لە كاتەكانی دوای نیوەڕۆ بۆ سەر زۆربەی ناوچەكانی هەرێم، هاوكات خێرایی با چالاك دەبێت كە هەندێك جار بۆ سەرووی 30 كیۆمەتر لە سەعاتێك دەبێت.

ئاماژە بەوەش كراوە، رۆژی دووشەم نمەبارانی پچڕپچڕ و هەورەبروسكە بەردەوام دەبێت، بەتایبەت لە ناوچە شاخاوییەكان و ناوچەكانی گەرمیان و ڕۆژهەڵاتی هەرێمی كوردستان، لە دوای نیوەڕۆوە شەپۆلەكە كۆتایی دێت و پلەكانی گەرما (3-5) پلەی سیلیزی نزم دەبێتەوە بە بەراورد بە پلەكانی گەرمی ئەمڕۆ.  

روون كراوەتەوە، پێشبینی دەكرێ ناوچە شاخاوییەكانی دهۆك و هەولێر و بەشێك لە ناوچەكانی گەرمیان، ڕێژەیەكی زیاتر بارانیان لێ ببارێ.