وەزیری ناوخۆ هۆشداریەکی بڵاو کردەوە

وەزیری ناوخۆی حكوومەتی هەرێمی كوردستان رای گەیاند، تكایە بۆ زۆركردنی بینەر و فۆڵۆوەر، بەدوای ڕووداوەكانی كوشتن مەكەون، بەڵكو بۆ چارەسەركردنی كێشەكان بەدوای ئەو ڕووداوانە بكەون.

ئەمڕۆ پێنجشەم 27ـی ئادار، ڕێبەر ئەحمەد وەزیری ناوخۆی هەرێمی كوردستان، لە كۆنگرەیەكی ڕۆژنامەوانیدا ڕای گەیاند، ڕاگەیاندن وەك پێناسەی خۆی دەسەڵاتی چوارەمە، لە چوارچێوەی ئەو دەسەڵاتە ڕێزی لێ گیراوە، حكوومەتی هەرێمی كوردستانیش پابەندە بە ئازادیی ڕادەبڕین و گەیشتن بە زانیارییەكان بۆ هەموو رۆژنامەنووسان.

زیاتر گوتی، ئەو یاسایانەی لە پەرلەمان و حكوومەتی هەرێمی كوردستان كاریان لەسەر دەكرێت، ئەو دەرفەتەی بۆ ڕاگەیەندنەكان ڕەخساندووە، هەروەها ڕۆڵی ڕاگەیاندن زۆر گرنگە كە هەم ئاشتەوایی كۆمەڵایەتی بپارێزێت، هەمیش زانیاریی پێویست بگەیەنێتە كۆمەڵگە.

روونی كردەوە، پرسیارەكە ئەوەیە دەبێت بە چ شێوازیك ڕووماڵی ئەو بابەتانەی كوشتنە بكرێت، كەسمان دژی ئەوە نەبووین كە ڕاگەیاندن باسی ئەو ڕووداوانەی ڕۆژانی ڕابردوو بكات، بەڵام دیاردە نەشازەكان بخرێتە بەر دیدی هەموو لایەك بۆ ئەوەی دووبارە نەبنەوە.

"داوامان لە ڕاگەیاندنەكان ئەوەیە، تكایە بۆ زۆركردنی بینەر و فۆڵۆوەر بەدوای ڕووداوەكانی كوشتن مەكەون، بەڵكو بۆ چارەسەركردنی كێشەكان بەدوای ئەو ڕووداوانە بكەون، تكایە ڕۆڵی پۆلیس و داواكاری گشتی و پزیشكی دادوەری مەبینین، یان لە بەرنامەكانتان بە ڕاستەوخۆ لەگەڵ تاوانباران قسە مەكەن، چونكە دەبێتە ڕێگەخۆشكەر بۆ ئەوەی تاوانبار پاساو بۆ تاوانەكەی بهێنێتەوە"، رێبەر ئەحمەد وای گوت.