پەیامێک لە وەزارەتی دارایی لەبارەی مووچە گەیشت

وەزارەتی دارایی و ئابووری حكوومەتی هەرێمی كوردستان، پشتڕاستی كردەوە كە تەمویلی مووچەی مانگی ئادار لەلایەن بەغداوە كراوە و لە سبەیەوە دەست بە دابەشكردنی مووچە دەكرێت. 

وەزارەتەكە رای گەیاندووە كە كەمێك لەمەوبەر بڕی 954 ملیار و 880 ملیۆن و 467 هەزار وەك تەمویلی مووچەی مانگی ئاداری مووچەخۆران و فەرمانبەران و خانەنشینانی هەرێمی كوردستان، لەلایەن وەزارەتی دارایی حكوومەتی فیدراڵەوە خرایە سەر هەژماری بانكی وەزارەتی دارایی و ئابووری هەرێمی كوردستان لە لقی هەولێری بانكی ناوەندی عێراق. 

ئاماژە بۆ ئەوەیش كراوە كە سبەی پێنجشەم دەست بە دابەشكردنی مووچەی مانگی ئادار دەكرێت، ئەو مووچەخۆرانەی لە ڕێگەی پڕۆژەی هەژماری منەوە مووچە وەردەگرن، ڕاستەوخۆ پارە دەخرێتە سەر هەژمارەكانیان و لەڕێگەی كورتەنامەوە ئاگەدار دەكرێنەوە.

هەروەها ئەو مووچەخۆرانەی بەشێوەی كاش مووچە وەردەگرن، دوای گواستنەوەی پارە بۆ بانكەكان، لە كەمترین ماوەدا ڕاستەوخۆ دەست بەدابەشكردنی مووچەكانیان دەكرێت.