میدیاكانی سلێمانی رووماڵی كوشتن بكەن دەدرێنە دادگا

داواكاری گشتیی سلێمانی رای گەیاند، هەر كەناڵ و میدیایەك هەواڵی كوشتن رووماڵ بكات، رووبەڕووی رێككاری یاسایی دەبێتەوە.

ئەمڕۆ چوارشەم 26ـی ئادار، بەپێی نووسراوێكی فەرمانگەی داواكاریی گشتیی سلێمانی كە ئاراستەی بەڕێوەبەرایەتیی رۆشنبیری كردووە و تێیدا هاتووە، زۆر لە كەناڵەكان لە كاتی رووماڵكردنی رووداوێك بەتایبەت كوشتن، بەبێ رەچاوكردنی ئیتیكی كاری رۆژنامەوانی و یاسا كارپێكراوەكان، زانیاریی ناڕاست بڵاو دەكەنەوە.

ئاماژەی بەوەش كردووە، ئەم كارە كاریگەریی لەسەر دەروونی هاووڵاتییان، رەوتی لێكۆڵینەوەكان و ئاراستەكردنی رای گشتی دەبێت.

داواشی كردووە، دەزگاكانی راگەیاندن پابەندبن بە خۆبەدوورگرتن لەو جۆرە هەواڵانە، بە پێچەوانەوە رێكاری یاساییان لە دژ دەگیرێتەبەر. 

ئەوە لە كاتێكدایە بەشێكی زۆری هاووڵاتییان لە رابردوودا داواكار بوون، رووماڵی پێشوەختە و شیكردنەوە لەلایەن رۆژنامەنووسان بۆ كێشە كۆمەڵایەتی و كوشتنەكان رابگیرێت.