ئاری هه‌رسین به‌رپرسی لقی چواری پارتی دیموكراتی كوردستان له سلێمانی، له چاوپێكه‌وتنێك، تیشك ده‌خاته سه‌ر كۆبوونه‌وه‌كانی پارتی و یه‌كێتی له‌باره‌ی رێككه‌وتن بۆ پێكهێنانی كابینه‌ی ده‌یه‌می حكوومه‌تی هه‌رێمی كوردستان. باسیش له‌وه ده‌كات، پێوه‌ندیی یه‌كێتی و پارتی ئێسته له باشترین حاڵه‌تی خۆیه‌تی و به‌مزووانه كابینه‌ی ده‌یه‌م راده‌گه‌یه‌نرێت و هیچ كێشه‌یه‌ك له نێوان هه‌ردوولا نه‌ماوه له گفتوگۆكان.
هه‌وڵه‌كانی پێكهێنانی كابینه‌ی ده‌یه‌م به كوێ گه‌یشتوون؟
هه‌وڵه‌كانی پێكهێنانی حكوومه‌ت به ئاكام گه‌یشتوون و هه‌ردوولا گه‌یشتوونه‌ته كۆتایی، پێوه‌ندیی هه‌ردوو حزب له ئاستێكی زۆرباش و له حاڵێكی ته‌ندروستدایه و هه‌ردوولاش دڵخۆشن، له ئاینده‌یه‌كی نزیكدا موژده‌ی پێكهێنانی كابینه‌ی ده‌یه‌می حكوومه‌تی هه‌رێمی كوردستان ده‌ده‌ین به هاووڵاتییانی كوردستان.
گرفتی گه‌وره ماوه بۆ ئه‌وه‌ی هه‌ردوولا له‌سه‌ری رێكبكه‌ون؟
هه‌مووان دڵنیا ده‌كه‌ینه‌وه، هیچ گرفتێكی گه‌وره له گفتوگۆكان نه‌ماوه كه ببێته كێشه له به‌رده‌م دواخستنی پێكهێنانی حكوومه‌تی نوێ، هه‌مووان خه‌ڵكی دڵنیا ده‌كه‌ینه‌وه، هیچ شتێك له به‌رژه‌وه‌ندیی خه‌ڵك و نیشتمان گه‌وره‌تر نییه، بۆیه ئه‌وه‌نده‌ی ماوه رێككه‌وتن رابگه‌یه‌نین و كاره‌كان ده‌ست پێ بكه‌ن، هه‌ردوولا هه‌ست به‌وه ده‌كه‌ین به‌رژه‌وه‌ندیی خه‌ڵك و كوردستان پێش هه‌موو به‌رژه‌وه‌ندییه‌كی تره.
ئه‌م دواكه‌وتنه پێوه‌ندیی به یه‌كێتی هه‌بوو، یان پارتی، بڕیاربوو زووتر رێككه‌وتن رابگه‌یه‌نن؟
له هه‌موو دنیا بابه‌تی دانوستان له هه‌موو بوارێكدا نه‌ك هه‌ر پێكهێنانی حكوومه‌ت كاتی پێده‌چێت، هیچ كه‌سێك ناتوانێت كات دیاری بكات و بڵێت له فڵان رۆژ و كات رێككه‌وتنی پێكهێنانی حكوومه‌ت راده‌گه‌یه‌نرێت، ئه‌وه‌ی گرنگه هیچ گرفتێك نه‌ماوه و ئه‌وه‌ش بۆ هه‌مووان دڵخۆشكه‌ره، هه‌ندێك جار گفتوگۆكان دواده‌كه‌ون ئه‌مه شتێكی ئاساییه و له هه‌موو دنیادا وایه.
ئایا یه‌كێتی و پارتی گه‌ڕاونه‌ته‌وه بۆ سه‌رده‌می 50 به 50؟
نا، له‌به‌رئه‌وه‌ی كه‌س ئه‌نجامه‌كه نازانێت، ئه‌وه‌ی ئێسته گفتوگۆی نێوان ئێمه و یه‌كێتییه، ئه‌مه نووسینه‌وه‌ی دواكارنامه‌ی كابینه‌ی ده‌یه‌م نییه، ده‌رگاش كراوه‌یه، هه‌ر لایه‌نێكی سیاسیی كورسیی هه‌بێت له‌ناو په‌رله‌مان و ئاره‌زووی هه‌بێت، ده‌توانێت به‌شدار بێت و ڤیتۆ له‌سه‌ر هیچ لایه‌نێك نییه.
پارتی ده‌یه‌وێت له كابینه‌ی داهاتوو چی بكات بۆ خه‌ڵك؟
ئه‌وه‌ی كه خه‌ڵك چاوه‌ڕێ له پارتی بكات، حكوومه‌تێكی یه‌كگرتوو، حكوومه‌تێكی چاكساز و حكوومه‌تێكی خزمه‌تكاری خه‌ڵك بێت، پارتی كار بۆ جێبه‌جێكردنی ئه‌و به‌ڵێنانه ده‌كات كه له كاتی هه‌ڵبژاردن به خه‌ڵكی داوه.
ئه‌گه‌ر یه‌كێتی وه‌ك رابردوو به‌هه‌مانشێوه دژایه‌تی حكوومه‌تی كرده‌وه، چی روو ده‌دات؟
باش نییه به‌و جۆره بیر بكه‌ینه‌وه، شووشه‌یه‌كی ئاو هه‌یه، نیوه‌ی به‌تاڵه و نیوه‌ی ئاوه، ده‌توانی كه سه‌یری شووشه‌كه بكه‌ی بڵێی به‌تاڵه، ئه‌مه نائومێدی دروست ده‌كات لای خه‌ڵك، ده‌توانی بڵێی نیوه‌ی ئاوه، ئه‌مه ئومێد دروست ده‌كات لای خه‌ڵك، ده‌بێت تا كاتێك سه‌یری رابردوو بكه‌ین كه خزمه‌ت به داهاتوو بكه‌ین، نابێت له‌سه‌ر هه‌ندێ رووداوی رابردوو بڵێین گێره‌شێوێن، یه‌كێتیی نیشتمانیی كوردستان به نیازێكی باش هاتووه‌ته پێش و هیوامان هه‌یه كابینه‌یه‌كی زۆرباش بێت، به‌درێژایی ئه‌و چوار ساڵه ده‌بینه خزمه‌تكاری خه‌ڵك.
یه‌كێتی له سێ سه‌رۆكایه‌تییه‌كه هیچ سه‌رۆكایه‌تیی پێ ده‌درێت؟
ئاگاداری ورده‌كارییه‌كه نیم، به‌ڵام به‌مزووانه ئاشكرا ده‌بێت.
بەرپرسێکی پارتی پەیوه‌ندیی یه‌كێتی و پارتی لەباشترین دۆخی خۆیەتی به‌مزووانه كابینه‌ی نوێ داده‌مه‌زرێت
11رۆژ پێش ئێستا |
KurdistanPress  |
KurdistanPress
کوردستان پڕێس سەرچاوەیەکى گرنگ بۆ بینینى نوێترین هەواڵى سیاسیى , کۆمەڵایەتى,لە هەرێمی کوردستان ,ئەوروپا ئێمە فۆکس دەخاینە سەرئەوبابەتانەى کوردانەن و پەیوەندیان هەیە بە ئایندە و داهاتووى گەلەکەمان , ئامانجان بڵاوکردنەوەى بابەتى ڕۆشنبیرى و چەسپاندنی دیموكراتی, کارەنمان بڵاو دەکەینەوە لەڕیگەى ویب سایت و سۆشیال میدا لەئیستادا تەنیا بەزمانى کوردى بابەتەکانمان بڵاو دەکەینەوە لەناوخۆى کوردستان و ئەوروپا لە داهاتووى نزیک بەزمانى تریش کارەکانمان بڵاو دەکەینەوە ئامانجمان ئەوەیە ببینە سەرچاوەیەکى راست و گرنگ بۆ گەیاندنى هەوڵ بۆهەواداراکانمان بەپێى یاساکانى ڕۆژ نامەوانى , ئێمە لەڕێگەى لەتۆڕە کۆمەڵایەتیەکانمان و ویب سایتەکەمان بابەتەکانمان بڵاو دەکەینەوە
وەڵام بدەوه