ئەمشەو ئەگەری دروستبوونی شەختە هەیە

ئەمشەو لە هەرێمی کوردستان ساردترین شەوی بەهاری ئەمساڵ دەبێت و لە چەند ناوچەیەک پلەکانی گەرما دەگاتە چەندین پلەی ژێر سفری سەدی و دیاردەی شەختە روو دەدات.
ئەمشەو شەممە 22/3/2025، هەڤاڵ سەدیق گەڵۆزی، شارەزای بواری کەشناسی بڵاوی کردەوە: "درەنگانی ئەمشەو شەممە لەسەر یەکشەممە لە ئەنجامی زیادبوونی کاریگەری ئەو بارستە هەواساردەی کە له ڕۆژی هەینییەوە ڕوویکردۆتە وڵاتانی شام و باکووری کوردستان و هەرێمی کوردستان، پلەکانی گەرما لە ناوچە شاخاوییەکانی دهۆک و ئیدارەی سۆران و بەشێک لە ناوچەکانی ئیدارەی ڕاپەڕین و ناوچەکانی باکووری خۆرهەڵاتی پارێزگای سلێمانی لە ژێر سفری سیلیزییەوە دەبێت."
ئاماژەشی بەوە داوە: "ئەگەری دروستبوونی دیاردەی زوقم (شەختە) هەیە و دەیبەستێت، ساردترین ناوچەی هەرێمی کوردستانیش ناوچەکانی سنووری ئیدارەی سۆرانە لە ناحیەی حاجی ئۆمەران پلەکانی گەرما 7- بۆ 8- پلە لە ژێری سفرەوە دەبێت له هەندێ ناوچەش 11- تۆمار دەکات."
ئەوەشی خستووەتە روو: "کاریگەری ئەو بارستە هەوا ساردە لە ڕۆژی دووشەممەوە بەرەو لاوازبوون دەچێت پلەکانی گەرما 4 تا 5 پلە بەرز دەبێتەوە."