ناوەڕۆکی کۆبونەوەی ئەمڕۆی پارتی و یەکێتی گەیشت

شاندی دانوستانكاری پارتی دیموكراتی كوردستان و یەكێتیی نیشتمانیی كوردستان لە هەولێر لەبارەی دابەشكردنی پۆستەكان دەستیان بە گفتوگۆ كرد. 

 شاندی پارتی گەیشتوونەتە مەكتەبی سیاسیی یەكێتی لە هەولێر كۆبوونەوەی نێوان هەردوولا دەستی پێ كردووە. 

تا ئێستە زانیارییەكان بەمجۆرەن كە بۆ كۆتا جار هەردوو شاندی پارتی دیموكراتی كوردستان و یەكێتیی نیشتمانیی كوردستان كۆ دەبنەوە، كۆبوونەكە تایبەت دەبێت بە پرسی پێكهێنانی كابینەی 10یەمی حكوومەتی هەرێمی كوردستان و دابەشكردنی پۆست و بەرپرسیاریەتییەكان لە نێوان هەردوو حزب و كەمینەكان و حزبەكانی تر. 

ئەوە لە كاتێكدایە ڕۆژی یەكشەم لە پیرمام، مەسروور بارزانی سەرۆك وەزیرانی حكوومەتی هەرێمی كوردستان رای گەیاند، لە میانی پێشوازی بافڵ تاڵەبانی گفتوگۆمان لەبارەی هەنگاو و ڕێكارەكانی پێكهێنانی كابینەی دەیەمی حكوومەتی هەرێمی كوردستان كرد.

مەسروور بارزانی گوتی،  هەردوولا كۆبوونەوەكانمان بە ئەرێنی هەڵسەنگاند و هاوڕابووین لەسەر گرنگیی پێكهێنانی حكوومەتێكی بەهێز و یەكگرتوو و خزمەتگوزار.

بافڵ تاڵەبانی سەرۆكی یەكێتیی نیشتمانیی كوردستان دوای كۆبوونەوەكە ڕای گەیاند، ڕێككەوتن و كۆبوونەوەیەكی زۆر باش بووە، ئەوەی كە ماوە لیژنەی شاندی دانوستانكاری پارتی و یەكێتی بڕیاری لێ دەدەن و هەرچی زووە كابینەی 10 یەم پێك دەهێنین.