ئەپیکۆر : ئامادەین بۆ هەناردەكردنەوەی نەوتی هەرێمی کوردستان

 
کۆمەڵەی پیشەسازیی نەوت لە کوردستان 'ئەپیکۆر' لە ڕاگەیێنراوێکدا ئاماژە بەوەدەدەن، کە ئامادەن دەست بکەنەوە بە هەناردەکردنەوەی نەوتی هەرێمی کوردستان لە ڕێگەی بەندەری جەیهان، بەڵام مەرجیان هەیە.
 
 وەزارەتی نەوتی عێراق و وەزارەتی سامانە سرووشتییەکانی هەرێمی کوردستان ئامادەییان پیشانداوە، بۆ ئەوەی دوای نزیکەی دوو ساڵ لە زووترین کاتدا دەست بە هەناردەی نەوت بکەنەوە، ئەپیکۆریش هەڵوێستی خۆی لەوبارەیەوە دووپاتکردەوە و ئامادەن بۆ هەنگاوە کردەییەکان.
 
 کۆمەڵەی پێشەسازی نەوت  لە کوردستان (ئەپیکور) لە ڕاگەیێنراوێکدا دەڵێت، "کۆمپانیاکانمان ئامادەن بۆ دەستپێکردنەوەی هەناردەی نەوتی کوردستان، بەڵام مەرجمان ئەوەیە ڕێككەوتنێكی نووسراو هەبێت و پارێزگاری مەرجەكانی گرێبەست و بازرگانی و ئابووری کۆمپانیاكان بكات."
 
 ڕۆژی شەممە وەزارەتی نەوتی عێراق ڕایگەیاند، ڕێکارەکان بۆ دووبارە هەناردەکردنەوەی نەوتی هەرێمی کوردستان تەواوبوون، بۆیە داوا لە حکومەتی هەرێمی کوردستان دەکات نەوت ڕادەستی کۆمپانیای سۆمۆ بکات بەمەبەستی هەناردەکردنی لەڕێگەی بەندەری جەیهانەوە.
 
لە وەڵامی ڕاگەیێنراوەکەی وەزارەتی نەوتی عێراق، شاندی دانوستاندنکاری حکومەتی هەرێمی کوردستان جەخت لەوە دەکەنەوە ڕێککەوتن بکرێت لەسەر بڕی نەوتی تەرخانکراو بۆ پێداویستی ناوخۆ بەگوێرەی پێداویستی ڕاستەقینەی هەرێمی کوردستان و پابەندییەکانی هاوشێوەی ناوچەکانی دیکەی عێراق و پێویستە ڕێککەوتن بکرێت لەسەر ڕێکاری دیاریکراو و ڕوون بۆ چۆنیەتی دانەوەی شایستە داراییەکانی کۆمپانیاکانی تایبەت بە بەرهەمهێنان و گواستنەوەی نەوتی هەرێمی کوردستان.