ڕووداوەكانی كوشتن و بڕین و هەڵکوتانە سەر خەڵک، هەروەها جموجۆڵی چەكدارانی داعش لە سنووری پارێزگای كەركووك زیادیان كردووە و بەڕێوەبەری ئاسایشی كەركووكیش ڕای گەیاند لە سێ مانگی ڕابردوودا 299 ڕووداوی جۆراوجۆری ئەمنی لەناو شاری كەركووك و دەوروبەری ڕوویان داوە.
عەمید ئیدریس ڕەفعەت، بەڕێوەبەری ئاسایشی كەركووك، ئەمڕۆ یەكشەممە 25/4/2021 ڕایگەیاند: "گۆڕانكاری ئەمنیی و ئیداری و سیاسی لە دوای خیانەتی 16ی ئۆكتۆبەری 2017ەوە لە سنووری پارێزگای كەركووك ڕوویان داوە و بەشێوەیەكی گشتی ئەو گۆڕنكارییە نەرێنییانە بوونەتە هۆی ئەوەی ڕەوشی ناوچەكە لە زۆر ڕووەوە تێك چوو، گرینگترینیان دۆسیەی ئەمنییە كە لە ماوەكانی ڕابردوودا كۆمەڵێك هێرشی چەكداری ڕوویان دا و تەقینەوەی جۆراوجۆریش لە سەنتەری پارێزگا و هەمیش لە قەزا و ناحییەكانی دەوروبەری كەركووك ڕوویان دا و درێژەیان هەبووە، پاشان هێرش کراوەتە سەر چەندین شوێنی هەستیار و ئێستاش رۆژ لە دوای رۆژ دۆخی ئەمنیی پارێزگاكە بەرەو خراپی دەڕوات".
ئاشكراشی كرد: "تەنیا لە ماوەی سێ مانگی ڕابردوودا 299 حاڵەتی جۆراوجۆری ئەمنی کە بریتی بوون لە كوشتن، تیرۆركردن، هەڵكوتانە سەر ماڵان و دەستدرێژیکردنە سەر هاووڵاتییانی كورد و نەتەوەكانی دیکەش لە كەركووك و دەوروبەری ڕوویان داوە، هەروەها تا ئێستاش ڕووداوە ئەمنییە نەخوازراوەكان بەردەوامن و لەناو ئەو 299 ڕووداوە ئەمنییانەدا 86 حاڵەتیان ڕووداوی كوشتن و برینداركردن بوون".
بەڕێوەبەری ئاسایشی كەركووك، ئەوەشی خستە ڕوو: "لە خوارووی قەزای داقووق چەند گوندێكی عەرەبنشین هەن و خەڵكی توندڕەویان تێدایە و لەوێوە تا دەگاتە زنجیرە چیای حەمرین تا سنووری قەزای حەویجە و ناحییەكانی ڕەشاد و ریاز و عەباسییە، ئەو ناوچانە رێكخراوی تیرۆریستیی داعش بەتەواوەتی تێیاندا باڵادەستە، بەتایبەت لە دوای بانگی ئێوارەوە ئیتر شتێك لەو ناوچانە بەناوی حكوومەت و هێزی ئەمنیی نامێنێت و مەترسی لەسەر ژیانی هاووڵاتییان هەیە
وەڵام بدەوه