لیستی مووچەی مانگی یەک ئامادەیە ڕادەستی بەغدا دەکرێت

دوای هەفتەیەک کارکردن بە هاوبەشی، لەلایەن تیمی وەزارەتی دارایی عێراق و تیمە تەکنیکییەکانی وەزارەتی دارایی و ئابووریی کوردستان، لیستی مووچەی مانگی یەک ئامادەکراو کۆتایی ئەم هەفتەیە شاندێک دەچێتە بەغدا و ڕادەستی وەزارەتی دارایی عێراقی دەکەن.
 
 28 ڕۆژ لە مانگی یەکی ساڵی 2025 تێپەڕیوە، هێشتا وەزارەتی دارایی عێراق پارەی مووچەی مانگی یەکی خەرجنەکردووە، بیانووی بەغدا ئامادەکردنی لیستی مووچەبوو بەشێوازێکی نوێ، هەفتەیەکیش شاندێکی تەکنیکی ناردە هەرێمی کوردستان بۆ گەیاندن و جێبەجێکردنی ڕێنمایی و داواکاری نوێ و لەگەڵ هاوتاکانیان لە وەزارەتی دارایی هەرێمی کوردستان بەهاوبەشی کاریانکرد تاوەکو هەموو داواکارییە نوێکانی بەغدا جێبەجێکرا و لیستەکە ئامادەکرا.
 
 سەرچاوەیەکی باڵا لە وەزارەتی دارایی و ئابووری هەرێمی کوردستان ڕایگەیاند "لیستی مووچەی مانگی یەک بە شێوازی نوێ ئامادەکراوە و ڕۆژی هەینی شاندێکی تەکنیکی وەزارەت سەردانی بەغدا دەکەن و لەگەڵ خۆیان لیستەکەش دەبەن."
 
 ئەو شاندە لیستەکانی مووچەی فەرمانبەران و خانەنشینی لەگەڵ میزان موراجەعەی مانگی 12 دەبەن، دواتر لەسەر ئاستی باڵا  شاندەکان کۆبوونەوە دەکەن بۆ ڕێککەوتن لەسەر کۆی پرسە داراییەکانی نێوان هەولێر و بەغدا.