ئەو بڕیارەی مەسروور بارزانی سەرۆك وەزیرانی كوردستان لە 15ی ئەم مانگە دەری كرد و تەمەنی خانەنشینی هاوتای یاسای یەكگرتووی خانەنشینی عێراق كرد، ئەم هەفتەیە جێبەجێ دەكرێت.
بەگوێرەی فەرمانەكەی مەسروور بارزانی سەرۆك وەزیرانی كوردستان كە 15ی ئەم مانگە دەرچووە، هەر فەرمانبەرێك تەمەنی بەگوێرەی رۆژ و مانگ 60 ساڵی تەواو كردبێت، حەواڵەی خانەنشینی دەكرێت و یاسای خانەنشینی یەكگرتووی لەسەر جێبەجێ دەكرێت.
بەگوێرەی بە دواداچوونەكانی "کوردستان پرێس" بەشێك لەو فەرمانبەرانەی كە ئەو یاسایە دەیانگرێتەوە، 60 ساڵیان تێپەڕاندووە و هەندێكی تریش لەم مانگەدا دەبن بە 60 ساڵ كە كۆیی ئەو فەرمانبەرانە، نزیكەی 21 هەزار فەرمانبەر دەبێت.
عەبدولقادر ساڵح شارەزای یاسایی و ئیداری لە فەیسبووكی خۆی ئاماژەی بۆ ئەوە كردووە، بڕیارەكە جێبەجێكردنی دەقاودەقی یاسای خانەنشینی یەكگرتووی ژمارە (9)ی ساڵی 2014 ی هەمواركراوە و تەواوی حوكمەكانی یاساكە دەخاتە بواری جێبەجێكردنەوە، چونكە پێشتر مووچە و لێبڕینی خانەنشینی بەپێی یاساكە لە 1/7/2024ەوە چووە بواری جێبەجێكردنەوە، لەم بڕیارەشدا تەمەنی یاسایی خانەنشنیی بەپێی یاساكە جێگیر كراوە.
ئاماژەی بۆ ئەوەیش كردووە كە بابەتی داواكردن بۆ خۆخانەنشینكردنی بڕاندووەتەوە و پێویستە بەپێی یاساكە، یان 25 ساڵ راژەی هەبێت یان تەمەنی 50 ساڵی تەواو كردبێت و 15 ساڵ راژەی هەبێت، ئەو فەرمانبەرەی حەواڵەی خانەنشینی دەكرێت، جا بەهۆی تەواوكردنی تەمەنی یاسایی خانەنشینییەوە بێت یان بە هۆكاری تەندروستی یان مردن یان داوای حەواڵەكردن بۆ خانەنشنیی و خاوەنی 25 ساڵ راژە بێت، ئەوا شایستەی پاداشتی كۆتایی راژە دەیانگرێتەوە .
وەڵام بدەوه