پارەى بژمێرەکان گەیشت

بەرپرسێكی باڵای سەرژمێری ئاشکرای دەکات، پارەی مووچە و شایستەی دارایی کارمەندانی سەرژمێری گەیشتە هەرێمی کوردستان و دەڵێت: "پارەکە بەش بەش لە بانک وەردەگیرێت و دابەش دەکرێت."
مەحموود عوسمان، بەڕێوەبەری جێبەجێكاری سەرژمێری لە هەرێمی كوردستان،  رایگەیاند: "مووچە و شایسته داراییەکانی کارمەندانی کۆمسیۆن و بژمێرەکان بۆ ڕۆژانی سەرژمێری گەیشتە هەرێمی کوردستان، بەڵام پارەکە بەش بەش لە بانک وەردەگیرێت."
ئاماژەی بەوەش دا: "پارەکە لە بانک وەردەگیرێت و رادەستی ژمێریاریی بەڕێوەبەرایەتییەکانی ئاماری پارێزگاکان دەکرێت، بۆ ئەوەی بەسەریاندا دابەشی بکەن."
ئاشکراشی کرد: "لە هەفتەی رابردووەوە دەست کراوە بە دابەشکردنی پارە و بەردەوام دەبێت تاکوو دوا کارمەند و بژمێر وەری دەگرێت و مافی هەموان پارێزراوە."
مەحموود عوسمان ئەوەشی خستە ڕوو: "بەگشتی 27 هەزار کارمەندی سەرژمێری لە هەرێمی کوردستان مووچە و شایستەی داراییان هەیە."
سەبارەت بە وردەکاریی شایستەکانیان، بەڕێوەبەری جێبەجێكاری سەرژمێری لە هەرێمی كوردستان گوتی: "مووچەی مانگانە و شایستەی خۆراک و شایستەی خولی ڕاهێنان و شایستەی هاندانیان بۆ خەرج دەکرێت، مووچەکەش جێگیرە و 250 هەزار دیناری مانگانەیە."
بەگشتی لە تەواوی عێراق 150 هەزار کارمەندی سەرژمێری شایستەی داراییان هەیە، کە 27 هەزاریان لە هەرێمی کوردستانن.