هەواڵێکى خۆش بۆ خاوەن تۆمبێلی مەلیکە هات

دوای خۆپێشاندان و گردبوونەوەی خاوەن ئۆتۆمبێلەکانی مەلیکە و شاهین بڕیار درا دەستبەسەرداگرتنی ئۆتۆمبێلی مەلیکە و شاهین بە كاتی ڕابگیرێت.

لێدوانی فەرمی: سوارە عومەر، نوێنەری خاوەن ئۆتۆمبێلە بێسەرەتاكان لە كۆنفڕانسێكی ڕۆژنامەوانیدا ڕایگەیاند: ئەمڕۆ لەگەڵ بافڵ تاڵەبانی، سەرۆكی یەكێتیی نیشتمانیی كوردستان كۆبووینەوە و بڕیاری دا، بڕیاری قەدەغەكردنی ئۆتۆمبێلە بێسەرەتەكان ڕابگیرێت.

زانیاریی زیاتر: نوێنەری ئۆتۆمبێلە بێ سەرەتاكان و بافڵ تاڵەبانی لەسەر چەند خاڵێک ڕێككەوتن كە ئەمانەی خوارەوەن:-

1- ڕێوشوێنەكان بە كاتی ڕابگیرێن

2- سیستەمی دەزگای ئاسایش و هێزەكانی ناوخۆ وەك خۆی جێبەجێ بكرێن

3- لیژنەیەک پێكدەهێنرێت كە نوێنەری سەرۆكی یەكێتی، نوێنەری قوباد تاڵەبانی، دەزگە ئەمنییەكان  و بەشی یاسایی تێیدا بەشدار بێت, 

4 - ئەو ئۆتۆمبێلانەی لە ماوەی ڕابردوو دەستیان بەسەرداگیرابوو بدرێنەوە خاوەنەكانیان بەمەرجێک تاوانی پێ ئەنجام نەدرابێت.

5-ڕێگری بكرێت لە داخڵكردن و  هاوردەكردنی ئۆتۆمبێلی بێ سەرەتا لە هەرێمی كوردستان.

6- یاسا بەركارەكانی هەرێمی كوردستان بەسەر هەموو كەس و شۆفێر و ئۆتۆمبێلێكدا وەك خۆی جێبەجێ بكرێت بەبێ جیاوازی.

7- بەهیچ شێوەیەک ڕێگە نادرێت كڕین و فرۆشتن لە پێشەنگاكانی ئۆتۆمبێل بەو ئۆتۆمبێلە بێ سەرەتایانە بكرێت تا بڕیاری لیژنەكە دەردەچێت.

8- داوا دەكرێت كێشەی ئۆتۆمبێلە بێ سەرەتاكانی شارەكانی هەولێر و دهۆک و سۆرانیش چارەسەر بكرێت.