ئەمرۆ مووچەى ئەو کەسانە دابەشدەکرێت

ئەمڕۆ چوارشەممە 25/12/2024، وێڕای پشوو بانکێكی ئیدارەی سەربەخۆی ڕاپەڕین، مووچەی خانەنشینانی پێشمەرگە دابەش دەكرێت. بەرپرسێکی بانکەکەش دەڵێت: "خانەنشینانی هێزەکانی 70، مانگەکانی پێشوو کێشەی تەمویلیان هەبوو، بۆ مووچەی مانگی 10 ئەو مووچەخۆرانە هیچ کێشەیەکیان نەماوە و لیست و پارەیان دابەش دەکەین."

سیروان عومەر، بەڕێوەبەری بانکی کێوەڕەش، بە (کوردستان پرێس)ی ڕاگەیاند: "ئەمڕۆ چوارشەمە 25ی 12، وێڕای پشوو، بەڵام مووچەی خانەنشینی هێزەكانی 70 لە بانکەکەمان دابەش دەکرێ".

ئاماژەی بەوەش دا: "مووچەی دوو جۆر خانەنشینی پێشمەرگە لای ئێمەیە، ئەوانەی لەگەڵ وەزارەتی پێشمەرگەدان دوێنێ مووچەیان دابەش کرا، کە زیاتر لە هەزار و 600 کەس بوون."

بەڕێوەبەری بانکی کێوەڕەش لە ئیدارەی سەربەخۆی ڕاپەڕین، ئاشکراشی کرد: "ئەوانەی ئەمڕۆ مووچە لای ئێمه وەردەگرن، خانەنشینانی هێزەکانی 70ن، مانگەکانی پێشوو کێشەی تەمویلیان هەبوو."

سیروان عومەر، هەواڵێکی دڵخۆشکەری بەو مووچەخۆرانەدا و گوتی: "بۆ مووچەی مانگی 10، ئەو مووچەخۆرانە هیچ کێشەیەکیان نەماوە و لیست و پارەیان هاتووە و ئەمڕۆ مووچەیان دابەش دەکەین."

ئەو بانکەی سەر بە وەزارەتی دارای هەرێمی كوردستان، جەختی کردەوە، ئەوانەی مووچەیان لای ئەوانە، ئەمڕۆ مووچەی خۆیان وەردەگرن.

دابەشكردنی مووچەی ئەو توێژە لەکاتێکدایە، فەرمانبەران و مووچەخۆرانی دیکە مووچەی مانگی 10یان وەرگرتووە.