بەڕێوەبەری گشتیی بازرگانی ئاشكرای دەكات، لە هەرێمی كوردستاندا دەست بە دابەشكردنی بەشەخۆراكی نۆیەم و بەشەئاردی دەیەمی ئەمساڵ كراوە.
نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازیی حكوومەتی هەرێمی كوردستان، ڕاگەیاند: "دەست بە دابەشكردنی بەشی نۆیەمی خۆراکی مانگانەی هاووڵاتییان و بەشی دەیەمی ئاردی ئەمساڵ كراوە."
ئاماژەی بەوەش دا: "بۆ بەشەخۆراكی نۆیەم برنج سێ كیلۆیە، شەكر كیلۆیەكە، زەیت لیترێكە، 400گرام دۆشاوی تەماتە و لە هەندێك شوێن نیوكیلۆ ماش و لە هەندێك شوێنی دیكەش ئارینۆكە." ئەوەشی خستە ڕوو، بۆ بەشەئاردیش، وەكوو پێشوو بۆ هەر هاووڵاتییەك نۆ كیلۆ ئاردە.
لە سەرێكی دیكەوە، دلێر عەبدولواحید، بەڕێوەبەری دابەشکردنی خۆراک لە هەولێر، ڕاگەیاند: "دابەشکردنی بەشەخۆراكی نۆیەم دەستی پێكردووە و ئەو بریكارانەی پارەیان لە رێگەی كارتی بانكی رادەست كردووە، بەشەخۆراكیان پێ دراوە و پڕۆسەكەش بەردەوامە."
وەڵام بدەوه