بەغدا بۆ مووچەى مانگى دە پارەی ناردوو بڕەکەى ڕاگەیاندرا

وەزارەتی دارایی حکومەتی فیدراڵی عێراق بڕیاری دا 761 ملیار و 146 ملیۆن دینار بۆ مووچەی مانگی 10 خەرج بکات، هاوکات بڕیاری داوە تاوەکو ئەم مووچەیە دابەش نەکرێت، هیچ بڕە پارەیەکی دیکە نەنێرێت.

وەزارەتی دارایی عێراق بڕیاری خەرجکردنی  763 ملیار و 146 ملیۆن دیناری بۆ مووچەی مانگی 10ی مووچەخۆرانی هەرێمی کوردستان دا، بەڵام بڕی دوو ملیار دینار وەکو لێبڕینی 10%ی مووچەی بنەڕەتی خانەنشینی لەلایەن بەغدا دەگێڕدرێتەوە.

سەرچاوەیەک لە وەزارەتی دارایی و ئابووریی هەرێمی کوردستانڕایگەیاند، وەزارەتی دارایی عێراق تەنیا بڕیاری خەرجکردنی بڕە پارەکەی داوە و ڕۆژی یەکشەممە 1ـی12 دەخرێتە سەر هەژماری بانکی هەرێمی کوردستان.

ئەو پارەیەی بەغدا ناردوویەتی بەشی مووچە ناکات و حکومەتی هەرێمی کوردستان پێویستی بە 996 ملیار دینار هەیە، بەمپێیە بڕی 233 ملیار دینار کورتهێنان دروست دەبێت.

بەغدا داوای کردووە هەرێمی کوردستان  خۆی بە داهاتی ناوخۆ کورتهێنانەکە پڕبکاتەوە، بڕیاریشی داوە هیچ بڕە پارەیەکی دیکە بۆ هەرێمی کوردستان نەنێرێت تاوەکو مووچەی مانگی 10 دابەش نەکرێت. 

 لە ئێستاوە وەزارەتی دارایی و ئابووری هەرێمى کوردستان دەستی بە ئامادەکردنی لیستی مووچەی مانگی 12 کردووە، بۆ ئەوەی بەرلە داخستنی حیساباتی کۆتایی ئەمساڵ25ی مانگی 12، لیستەکە رەوانەی بەغدا بکرێت، دوو ڕۆژ پێش ئیستاش لیستی مانگی 11 ڕەوانە کرابوو.

 حکومەتی عێراق بڕیاری داوە بۆ مووچەی مانگەکانی یانزە و دوانزەش هەر ئەم برە پارەیە، واتە 760 ملیار دینار شتێک کەمتر یان زیاتر بنێرێت، بەهەمانشێوە لەم دوو مانگەش کورتهێنان دروست دەبێت.