ئەمڕۆ، كۆمیسیۆنی باڵای هەڵبژاردنەكانی عێراق بە نووسراوی فەرمی سەرۆكایەتیی هەرێمی كوردستانی لە پەسندكردنی ئەنجامەكانی هەڵبژاردنی خولی شەشەمی پەرلەمانی كوردستان ئاگاداری كردووەتەوە و لە داهاتوویەكی نزیكیشدا، سەرۆكی هەرێمی كوردستان فەرمان بۆ بەڕێوەچوونی دانیشتنی یەكەمی خولی شەشەمی پەرلەمان دەردەكات.
لە لێدوانێكیدا، دڵشاد شەهاب، گوتەبێژی سەرۆكایەتیی هەرێمی كوردستان بە ماڵپەڕی سەرۆكایەتیی هەرێمی كوردستانی ڕاگەیاندووە: "ئەمڕۆ یەکشەممە 24ی 11ی 2024، کۆمیسیۆنی باڵای هەڵبژاردنەکان بە نووسراوی فەرمی، سەرۆکایەتیی هەرێمی کوردستانی لە پەسەندکردنی ئەنجامەکانی هەڵبژاردنی خولی شەشەمی پەرلەمانی کوردستان، ئاگادار کردەوە."
گوتەبێژی سەرۆكایەتیی هەرێم سەبارەت بە ڕێوشوێنەکانی دوای پەسەندکردنی ئەنجامەکان، ڕایگەیاندووە: "بەپێی یاسای سەرۆکایەتیی هەرێمی کوردستان، لە داهاتوویەکی نزیکدا سەرۆکی هەرێمی کوردستان فەرمان بۆ بەڕێوەچوونی دانیشتنی یەکەمی خولی شەشەمی پەرلەمانی کوردستان، دەردەکات."
وەڵام بدەوه