ئاراس جەبار، شارەزای كەشناسی، ڕایگەیاند: سبەی یەکشەمە 24/11/2024 لە کاتەکانی شەودا ھەرێمی کوردستان و ناوچەکە دەکەوێتەوە ژێر کاریگەریی نزمەپاڵەپەستۆیەکی ساردی جەمسەری باکوور کە لە رۆژانی ڕابردوودا بەشێکی زۆری وڵاتانی ئەورووپای گرتەوە بە شێوەی شەپۆلی سەرما و بەفربارین، سەرەتا سبەی شەو کاریگەرییەکانی لەسەر ناوچەکانی پارێزگای دھۆک دەست پێدەکات بە چالاکبوونی بای باشوری رۆژھەڵات بە خێرایی 15 - 35 کم لە کاتژمێرێکدا و بارانی پچرپچر و زستانە بە ڕێژەی ناوەند و پاشان بۆ دوو سبەی رۆژی دووشەمە 25/11/2024 سەرجەم ناوچەکانی ھەرێمی كوردستان بە ڕێژەی جیاواز دەگرێتەوە و پلەی گەرما 8 تا 12 پلە نزم دەبێتەوە و لە ناوچە شاخاوییەکانی بەرزیی 1500 مەتر دەبێتە بەفر بارینی راستەقینە و لەخوار ئەو بەرزییەش جاروبار بارانەکە بەفری لەگەڵدا دەبێت، زۆرترین رێژەی دابارین لە ناوچە شاخاوییەکان بە گشتی و سنووری پارێزگای دھۆک و ناوچە شاخاویییەكانی پارێزگای ھەولێر و سنووری پارێزگای سلێمانی و ھەڵەبجە و ئیدارەی سۆران و راپەرین دەبێت، کەمترین رێژەش لە ناوچەکانی ئیدارەی گەرمیان و پارێزگای کەرکووک و سەنتەری پارێزگای ھەولێر دەبێت .
ئاراس جەبار ڕاشیگەیاند: بەرەبەیانی رۆژی سێشەمە 26/11/2024 شەپۆلەكە لاواز دەبێت و بە لاوازی بەردەوام دەبێت تا درەنگانی شەوی سێشەممە لەسەر چوارشەممە 27/11/2024 پاشان کۆتایی پێ دێت لەم قۆناغەی لاوازبووندا پلەی گەرما زیاتر نزم دەبێتەوە و ئەگەری بارینی بەفرێکی کەم دەبێت لەو شار و ناوچە شاخاوییانەی بەرزییان زیاترە لە 1200 مەتر، بە نموونە سەنتەری شاری پێنجوێن و شاخەکانی شاری سلێمانی گۆیژە و ئەزمەر ئەگەری بەفر بارینیان دەبێت .
سەرنجی خستە سەر ئەوەش: بارانی بەخوڕ و لافاو نابێت و جیاواز لە حاڵەتەکانی پێشتر بارانێکی لەسەرخۆ و زستانەییە، رێژەکەشی ناوەند دەبێت و ئەگەری دروستبوونی ھەورە بروسکەش لاواز دەبێت، بۆیە ئەو دەنگۆیانە رەتدەکەینەوە کە باس لەبارانی بەخور و لافاو دەکەن .
ئاراس جەبار وردەكاریی كەشوهەوای ڕۆژانی دواتریش باس دەكات و دەڵێ: ئەگەر گۆڕانكاری روو نەدات، لە رۆژی چوارشەمەوە 27/11/2024 تا ماوەی 10 رۆژێک ناوچەکانمان لەژێر کاریگەری وشکە سەرمادا دەمێنێتەوە و لەشەواندا پلەی گەرما بۆ نزیک لە سفر پلە دادەبەزێ و لە ناوچە شاخاوییەکانیش چەند پلەیەک بۆ خوار سفر دەبێ، بە گشتی کەشێکی سارد و زستانە دەست پێدەکات.
وەڵام بدەوه