زستانە زۆر ساردەکە دەسپێدەکات

شارەزایەکی بواری کەشناسی زانیاریی نوێی لەبارەی هاتنی شەپۆلێکی بەفروباران بۆ ناوچە جیاوازەکانی هەرێمی کوردستان راگەیاند.

ئەمڕۆ پێنجشەممە 21/11/2024، ئاراس جەبار، شارەزای بواری کەشناسی بڵاوی کردەوە: "پێشبینی دەکرێت لە رۆژی دووشەممەی ھەفتەی داھاتوو 25/11/2024 ھەرێمی کوردستان و ناوچەکە بکەوێتە ژێر کاریگەری نزمەپاڵەپەستۆیەکی جەمسەرییەوە کە ئێستا کاریگەرییەکانی لەسەر وڵاتانی ئەورووپایە و بەرەبەیانی رۆژی دووشەممە ھەرێمی کوردستان دەگرێتەوە و خۆی دەبینێتەوە لە شەپۆلێکی ساردی بارانبارین و لەگەڵ بارینی بەفر لە ناوچە شاخاوییەکاندا و نزمبوونەوەیەکی بەرچاوی پلەکانی گەرماش بەرێژەی 8 تا 10 پلە."

ئاماژەشی بەوە داوە: "کاریگەریی شەپۆلی بەفروبارانەکە تا بەرەبەیانی رۆژی سێشەممە 26/11/2024 بەردەوامی دەبێت، بەڵام شەپۆلی سەرماکە لەسەر ناوچەکانمان تا ماوەیەکی زۆر دەمێنێتەوە و کەشێکی سارد و زستانەیی لەناوچەکەدا دەستپێدەکات."

روونیشی کردووەتەوە: "پێشبینی بارینی بەفر دەکرێت لە ناوچە شاخاوییە سنورییەکاندا لەبەرزی 1500 مەتر لە ئاستی ڕووی دەریا و نزمبوونەوەی پلەی گەرمی بۆ سفری سەدی و ژێر سفر لەو ناوچە شاخاوییانەی بەرزیان کەمترە لە 1500م بەفروباران بەتێکەڵی دەبارێت، لە سەنتەری شارەکان بارانێکی لەسەرخۆ و سارد دەبارێت و ھەست بە کەشێکی زۆر سارد دەکرێت."

هەروەها ئەو شارەزایەی بواری کەشناسی رێژەی بەفروبارانی پێشبینیکراوی لە ماوەی کاریگەری ئەم شەپۆلەدا بەم شێوەیەی خوارەوە خستووەتە روو:

پارێزگای ھەولێر (باران 7 - 60 ملم)، (بەفر 5 - 60 سم)

پارێزگای سلێمانی (باران 20 - 50 ملم) ، (بەفر 5 - 12 سم)

پارێزگای دھۆک (باران 26 - 50 ملم)، (بەفر 5 - 10 سم)

پارێزگای ھەڵەبجە (باران 30 - 50 ملم)، (بەفر 2 - 5 سم)

پارێزگای کەرکوک (باران 5 - 15 ملم)

ئیدارەی راپەرین (باران 20 - 60 ملم)، (بەفر 15 - 40 سم)

ئیدارەی گەرمیان (5 - 25 ملم)