کاتی گەیشتنی شەپۆلێکی بەفرو باران ڕاگەیاندرا

شارەزایەكی كەشناسی ئامۆژگاری هاووڵاتییان دەكات جلوبەرگی زستانە ئامادە بكەن، چونكە لە ناوەڕاستی هەفتەی داهاتووەوە بەتایبەتیش لە ڕۆژی دووشەممەوە، کەشێکی زۆر سارد ڕوو لە هەرێمی کوردستان بکات و بەفربارین ناوچه شاخاوییەکان بگرێتەوە .
هەڤاڵ سدیق گەڵۆزی شارەزای كەشناسی رایگەیاند: لەسبەینێ پێنجشەممەوە کەشوهەوا لە سەرجەم ناوچەكانی هەرێمی كوردستان ئاسایی دەبێته و ئاسمان ساماڵ و خۆرەتاو دەبێت.
راشیگەیاند: لە ناوەڕاستی هەفتەی داهاتوو دووبارە ناسەقامگیری كەشوهەوا ناوچەکەنی هەرێمی كوردستان دەگرێتەوە و شەپۆلێکی تری بەفر و بارانبارینی بەهێز ڕوو لە هەرێمی کوردستان دەكات.
هەروەها رایگەیاند: لەم شەپۆڵەدا پلەکانی گەرما دابەزینی بەرچاو بەخۆیانەوە دەبینن لەنێوان 5 بۆ 10 پلەی سیلیزی دادەبەزن، بەتایبەتیش لە شەوان و بەرەبەیاناندا هەست بەساردییەكی زۆر دەکرێت.
شارەزاكەی كەشناسی ئاماژەی بەوەش دا، لە ناوەڕاستی هەفتەی داهاتووەوە شەپۆلێکی چڕی بەفربارین ناوچە شاخاوییە سنوورییەکانی هەرێمی کوردستان دەگرێتەوە و بەشێوەیەك كە لە هەندێ ناوچەی شاخاوی پلەکانی گەرما دەگاتە سفری سیلیزی.