تۆم باراك، باڵوێزی ئەمەریكا لە توركیا و نێردەی تایبەتی ترەمپ بۆ عێراق، ڕای گەیاند کە ڕادەستكردنەوەی سەربازگەی زیلكان لەلایەن توركیاوە بە عێراق، وەک خاڵێکی وەرچەرخان دەبێت و سەروەریی عێراق و ئارامیی توركیا بەدوای خۆیدا دەهێنێت.
ئەم لێدوانەی باراك لە دوای ئەو کۆبوونەوەیە هات کە دوێنێ لە پەراوێزی کۆبوونەوەی گشتیی کۆمەڵەی نەتەوە یەکگرتووەکان لە نیویۆرک، لە نێوان عەلی زەیدی سەرۆک وەزیرانی عێراق و رەجەب تەیب ئەردۆغان سەرۆک کۆماری تورکیا بەڕێوە چوو، و تێیدا پرسی کشانەوەی سوپای تورکیا لە سەربازگەی زیلكان (بەعشیقە) لە سنووری مووسڵ تاوتوێ کراوە.
بەپێی زانیارییەکان، پرۆسەی کشانەوەی سوپای تورک لە سەربازگەكە و ڕادەستکردنەوەی بە سوپای عێراق، بەپێی میکانزمێک دەبێت و تا کۆتایی ئەمساڵ دەخایەنێت. پێشتر شاندێکی باڵای تەناهیی عێراق بە سەرۆکایەتیی قاسم عەبوودی ڕاوێژکاری باڵای ئاسایشی نەتەوەیی عێراق، سەردانی ئەنکەرەی کردبوو و نامە فەرمییەکەی سەرۆک وەزیرانی عێراقی گەیاندبووە ئەردۆغان بۆ کشانەوەی هێزەکانی تورکیا لە دەشتی نەینەوا.
بەغدا دووپاتی کردووەتەوە کە لە چوارچێوەی بەهێزکردنی سەروەریی دەوڵەت و کۆکردنەوەی چەکدا، پێویستە تا کۆتایی ئەمساڵ سەربازگەی باشیک-زێلكان چۆڵ بکرێت و ڕادەستی سوپای عێراق بکرێتەوە.
وەڵام بدەوه