نوێنەرایەتیی حكوومەتی هەرێمی كوردستان لە بەغدا، داوا دەكات ئەنجوومەنی ڕاژەی هەرێمی كوردستان و دیوانی چاودێریی دارایی فیدراڵی، دەست بە جێبەجێكردنی بڕیاری بەهەمیشەییكردنی فەرمانبەرانی گرێبەست و سێ یەكەمەكان بكەن، ئەوەیش دوای بەرزكردنەوەی نووسراوی فەرمی.
ئەمڕۆ سێشەم 19ـی تشرینی دووەم، بەپێی نووسراوێكی نوێنەرایەتیی حكوومەتی هەرێمی كوردستان لە بەغدا، لەبارەی پرسی بەهەمیشەییكردنی فەرمانبەرانی گرێبەست و سێ یەكەمەكانی زانكۆ و پەیمانگەكانی هەرێمی كوردستان؛ نووسراوێكی ئاراستەی سەرۆكی دیوانی چاودێریی دارایی فیدراڵی كرد.
لە نووسراوەكەدا هاتووە، داوای دیدارێك لە نێوان سیراج بارزانی سەرۆكی ئەنجوومەنی ڕاژەی هەرێمی كوردستان و عەمار سوبحی خەلەف سەرۆكی دیوانی چاودێریی دارایی فیدراڵی كراوە، بە مەبەستی جێبەجێكردنی بڕیاری دامەزراندنی فەرمانبەرانی گرێبەست و سێ یەكەكەمانی زانكۆ و پەیمانگەكان.
لە مانگی ئەیلوول ئەنجوومەنی وەزیرانی هەرێمی كوردستان دوای گفتوگۆ و ڕاگۆڕینەوە، بابەتی بە هەمیشەییكردنی فەرمانبەرانی گرێبەستی پەسند كرد، بە هەمان ئەو مەرج و میكانیزم و ڕێكارانەی كە حكوومەتی فیدراڵ لەمبارەیەوە پێڕەویان دەكات و بەگوێرەی پێداویستی و تایبەتمەندیی دامەزراوەكانی هەرێمی كوردستان.
هەرچی تایبەت بە دامەزراندنی سێ یەكەمەكانی زانكۆ و پەیمانگەكانیشە، ماوەی شەش ساڵە دامەزراندنیان ڕاگیراوە، ئەنجوومەنی وەزیران لە پاڵ بە هەمیشەییكردنی فەرمانبەرانی گرێبەست؛ بڕیاری دامەزراندنی نزیكەی 13 هەزار یەكەمی زانكۆ و پەیمانگەكانی هەرێمی كوردستان دەركردووە، وەزارەتی دارایی ڕاسپاردووە بۆ ئەو مەبەستە هاوئاهەنگیی لەگەڵ وەزارەتی دارایی عێراقی فیدراڵ بكات.
وەڵام بدەوه