بڕیارێک بۆ مووچەی مانگی یانزە دەرچوو

بۆ لیستی مووچەی مانگی 11 بڕیار دەرچوو

بەپێی نووسراوێكی وەزارەتی دارایی و ئابووری حكومەتی هەرێم، وەزارەتی دارایی سەرجەم وەزارەت و فەرمانگەكانی لەبارەی چۆنیەتیی ناردنی لیستی مووچەی مانگی 11 ئاگادار كردووەتەوە.

دەشڵێت: “دەبێت لە لیستی مووچەدا گشت فەرمانبەران ناویان لە لیستدا هەبێت و بە میلاك هەژمار بكرێت، مووچەخۆران و ئەوانەیشی مۆڵەتی بێمووچەیان هەیە، دەبێت بنووسرێن”.

داواش كراوە، كە: “ئەو فەرمانبەرانەی بەهۆی ئەوەی مۆڵەتیان هەیە و لەدەرەوەی وڵاتن و بایۆمەترییان نییە، دەبێت دیاری بكرێن”.

لە نووسراوەكەدا ئەوەش خراوەتەڕوو: “دەبێت گشت فەرمانبەران كۆدی (UPN)یان هەبێت و 13 ژمارە بێت و نابێت لە لیستی مووچەدا دووبارە بێتەوە”.

بەپێی نووسراوەكە، “نابێت ناوی دووبارە لە لیستی مووچەدا هەبێت، ئەگەر لە لیستی مووچەدا ناوی دووبارە هەبوو، بەڵام یەك كەس نەبوون و دوو كەسی جیا بوون، پێویستە ناوی دایكیان بنووسرێت”.

جەخت لەوەشكراوەتەوە، لیستی جیاوازی مووچەی فەرمانبەران، لەگەڵ لیستی مووچە بە سیدییەكی جیاواز و بە كاغەز بۆ دارایی بنێردرێت.

بەپێی نووسراوەكە، ئەو ژمێریارییانەی سیستەمی ناوەندی مووچە بەكار دەهێنن، تەنیا لە ڕێگەی ئەو سیستەمەوە لیستی مووچەیان لێ وەردەگیرێت.