هەواڵێکى دڵخۆشکەر دابەشكردنی زەوی خێراتر دەكرێت

دوای ئەوەی حكوومەتی هەرێمی كوردستان كە بڕیاری دا زەوی بەسەر فەرمانبەرانی هەرێمی كوردستاندا دابەش بكرێت، تا ئێستە زیاتر لە 12 هەزار پارچە زەوی بەسەر فەرمانبەران دابەش كراوە و بڕیاریشە پرۆسەكە خێراتر بكرێت.
لە ماوەی 10 رۆژی داهاتوودا قۆناغی دووەمی دابەشكردنی زەوی دەست پێ دەكات، لە هەولێر و سلێمانی و دهۆك تیروپشك بۆ 30 هەزار پارچە زەویی تر دەكرێت.
لەبارەی دابەشكردنی زەوی سەربەست مەولوود بەڕێوەبەری بەشی یاسایی لە وەزارەتی شارەوانی و گەشتوگوزار رای گەیاند، پرۆسەی دابەشكردنی زەوییان خێرا كردووە، بەشێوەیەك ڕۆژانە كار بۆ رێكخستنی فایلەكان دەكرێت و ئێستە وردبینی و پێداچوونەوە بە فۆرمی فەرمانبەرانی وەزارەتەكانی شارەوانی، دارایی، ناوخۆ، پەروەردە، خوێندنی باڵا و چەند وەزارەتێكی تر دەكرێت.
بەپێی زانیارییەكان، پرۆسەی دابەشكردنی زەوی بەسەر فەرمانبەران و خانەنشینان فراوان دەكرێت، ژمارەی ئەوانەی زەوییان پێ دەدرێت لە 200 هەزارەوە بۆ 350 هەزار كەس زیاد دەكرێت، بڕیارە هیچ فەرمانبەرێكی شایستە بێبەش نەكرێت.
لە كابینەی نۆدا بڕیار درا زەوی بەسەر فەرمانبەران دابەش بكرێت، ئەوەش بەپێی چەند مەرجێك دیاری كرابوو و ئێستە پرۆسەكە بەردەوامی هەیە و خێراتر كراوە.