هۆشداریەکى بەپەلە لە كۆمیسیۆنی باڵای هەڵبژاردنەكانی عێراقەوە

گوتەبێژی كۆمیسیۆنی باڵای سەربەخۆی هەڵبژاردنەكانی عێراق ڕایدەگەیەنێت، كە نوێنەری هەموو حزبەكان لە بنكە و وێستگەكانی دەنگدان دان و دەتوانن لەسەر هەر پێشێلكارییەك سكاڵا تۆمار بكەن.
ئەمڕۆ هەیینی 18ی 10ی 2024، جومانە غەلای، گوتەبێژی كۆمیسیۆنی باڵای سەربەخۆی هەڵبژاردنەكانی عێراق ڕایگەیاند: "حزبەكان نوێنەریان لە تێكڕای بنكە و وێستگەكانی دەنگدان هەیە و بۆ هەر پێشێلكارییەك دەتوانن سكاڵای خۆیان تۆمار بكەن."
گوتیشی: "هەر كەسێك هۆكاری دروستبوونی خروقات و پێشێلكاری بێت، سزای یاسایی دەدرێت."
گوتەبێژی كۆمیسیۆن ئەوەیشی ڕاگەیاند: "لە هەڵبژاردنەكان وێنە و ڤیدیۆی كۆن لەتۆڕە كۆمەڵایەتییەكان بڵاو دەكرێتەوە، ئەوەش بۆ دروستكردنی گومان و نانەوەی كێشە و گرفتە لە شێوازی بەڕێوەچوونی پڕۆسەی دەنگدان."
ئەوەشی گوت، كە ئەوان وەك كۆمیسیۆن لە ڕێگەی كامێراكانەوە، كە لە بنكە و وێستگەكانی دەنگدان دایانناوە، پێداچوونەوە بەو شوێنانەدا دەكەن، كە پێشێلكاری تێدا ئەنجام دراوە، لە ڕێگەی كامێراكانەوە سەیری دیمەنەكان دەكەنەوە.
جومانە غەلای، هۆشدارییەكی توندیشی دایە دەنگدەران و كارمەندانی بنكە و وێستگەكانی دەنگدانیش، كە هەر كەسێك لەو پێشێلكاریانەی لە ڕۆژی دەنگداندا دەكرێت و بەشدار بووبێت یاخود هۆكاری ڕوودانی ئەو پێشێلكاریانە بووبێت، ئەوا ڕێكاری توندی یاسایی بەرانبەر دەگرنەبەر و دەدرێتە دادگە لەسەر ئەو خروقات و پێشێلكاریانەی، كە ئەنجامی داوە.
ئەمە لە كاتێكدایە، ئەمڕۆ هەیینی 18ی 10ی 2024، پڕۆسەی دەنگدانی تایبەت لەسەرتاسەری هەرێمی كوردستان بەڕێوەدەچێت.