کاتی یەکەم باران بارینی ئەمساڵ راگەیێندرا

كەشناسێك رای گەیاند بەپێی پێشبینییەكان، ئەگەری هەیە لە نێوان 14 بۆ 17ی ئەیلوول باران لە هەرێمی كوردستان ببارێت.

ئەمڕۆ سێشەم سێی ئەیلوول، هەڤاڵ سدیق گەڵۆزی شارەزای كەشناسی، راگەیاند، یەكەم بارستە هەوای سارد ڕوو لە هەرێمی كوردستان دەكات و كەشێكی تەواو پایزی دروست دەكات، پلەكانی گەرما بەشێوەیەكی بەرچاو دابەزین بەخۆیەوە دەبینێت و یەكەم شەپۆلی بارانبارینی پایز هەرێمی كوردستان دەگرێتەوە .

زیاتر گوتی، بەگوێرەی نوێترین ئاپدێتی سەنتەری كەشناسی ئەمەریكی GFS لە ناوەڕاستی ئەم مانگەوە، لە نێوان 14 بۆ 17ی ئەم مانگە ئەیلوول، یەكەم بارستە هەوای ساردی پایزی ڕوو دەكاتە وڵاتانی شام و توركیا و عێراق و هەرێمی كوردستان، شەپۆلێكی تاوەباران و هەورەبروسكە ئەو ناوچانە دەگرێتەوە.

باسی لەوەش كرد، پلەكانی گەرما لە تەواوی ناوچە جیاجیاكانی عێراق و هەرێمی كوردستان بەشێوەیەكی بەرچاو دادەبەزن، كەشوهەوایەكی تەواو پایزی دروست دەبێت و هەست بەفێكی دەكرێت، لە شەواندا پلەكانی گەرما دابەزینی بەرچاو بەخۆیەوە دەبینێت و گەرمای هاوین كۆچ دەكات بارگەی تێكدەنێ . 

هاوكات بەگوێرەی پێشبینیی سەنتەری كەشناسی كەنەدیGEM  ، پێشبینی دەكرێت لە ناوەڕاستی هەفتەی داهاتوو بەدیاریكراوی لە ڕۆژی دووشەم نۆی ئەیلوول تا 12ـی ئەیلوول، كەشوهەوایەكی ناسەقامگیر لە ئەنجامی هاتنی نزمەپەستانی ناوچەكانی دەریای ناوەڕاست بۆ ناوچە جیاوازەكانی هەرێمی كوردستان، شەپۆلێكی هەور و تاوەباران ڕوو لە هەرێمی كوردستان بكات و ئەگەری نمەباران بۆ بارانی مامناوەند هەیە، بەتایبەت لە ناوچە شاخاوییەكانی هەرێمی كوردستان .