ئەفسەرێكی باڵای سوپای عێراق لە هێزی ئاسمانی، زانیارییەكی گرنگی ئاشكرا كرد لەبارەی خستنەخوارەوەی فڕۆكەیەكی بێ فڕۆكەوانی توركی لە شاری كەركووك. رای گەیاند كە لە سنووری سلێمانییەوە هاتووە.
ئەمڕۆ پێنجشەم 29ـی ئاب، عەمید ڕوكن عەبدولسەلام حەموودی جێگری فەرماندەی هێزی ئاسمانیی باكوری عێراق، دوای چوونە شوێنەكە و لێكۆڵینەوە رای گەیاند، بەناوی سوپای عێراقەوە سڵاوتان لێ دەكەم، ئەوەی ڕووی داوە خستنە خوارەوەی فڕۆكەیەكی بێ فڕۆكەوانی توركییە لە ئاسمانی شاری كەركووك كە ئاسمانی بەزاندووە و مۆڵەتی نەبووە.
زیاتر گوتی، ئەو فڕۆكەیە هیچ ڕێپێدان و هاوئاهەنگییەكی لەگەڵ سوپای عێراق و دەسەڵاتی مەدەنیی فڕۆكەوانی عێراق نەبووە، سەربەخۆ هاتووەتە ئاسمانی وڵاتەكەمان، بۆیە فەرمانمان پێ كرا هەرچی زووە بیخەینە خوارەوە و كارەكەشمان سەركەوتووانە ئەنجام دا.
روونیشی كردەوە، ئەو درۆنە لە سنووری ئاسمانیی سلێمانی داخلی ئاسمانی كەركووك بووە، هێزەكانی عێراق لە ناوچەی چیمەن لەڕێی چوار مووشەكەوە، فڕۆكەكەی توركیایان كردووەتە ئامانج و لە گەڕەكی زوبات ـ نزیك بەڕێوەبەرایەتیی پەروەردەی كەركووك كەوتووەتە خوارەوە.
پێش نیوەڕۆی ئەمڕۆ فڕۆكەیەكی توركی لە كەركووك كەوتە خوارەوە، ئەوەیش كاردانەوەی زۆری لێ كەوتەوە، ئێستە عێراق توركیا بە پێشێلكاریی سەروەری و تێپەڕاندنی ئاسمانی تاوانبار دەكات.
وەڵام بدەوه