راپۆرتەكانی هەواڵ باسی دەست پێكردنەوەی جموجۆڵەكانی رێكخراوی داعش لە چەند ناوچەیەكی سووریا و عێراق دەكەن، ئەگەرچی حكوومەتی ئەو دوو وڵاتە نكووڵی لەوە دەكەن، بەڵام پاشماوەی چەكدارانی ئەو رێكخراوە لە ناوچە دوورەدەست و چۆڵەوانییەكان هەن و هەموو هەلێك دەقۆزنەوە بۆ هێرشكردن و سەلماندنی مانەوەیان، لە دەشتی باشووری پارێزگەی دێرزوور لە سووریا بەهۆی هێرشێكی داعش بۆ سەر ئەوانەی دۆمەلان كۆ دەكەنەوە، دەیان كەس كوژران و رفێنران.
وەك روانگەی مافی مرۆڤی سووریا باسی كردووە، ئەمڕۆ چەكدارانی داعش هێرشیان كردووەتە سەر كاروانێكی ئۆتۆمبێلی ژمارەیەك هاووڵاتی و شەبیحەی سووریا لە دەشتی باشووری پارێزگەی دێرزوور، كە خەریكی كۆكردنەوەی دۆمەڵان بوون و ئەوان لەلایەن چەكدارانی داعشەوە گەمارۆ دران و تەقەیان لێ كراوە، بەو هۆیەشەوە 18یان كوژراون 16 بریندارن و زیاتر لە 50یان ونن و چارەنووسیان دیار نییە، جیا لە سووتاندنی 12 ئۆتۆمبێل.
سەرچاوەیەكی تر لەبارەی رووداوەكەوە گوتی، چەكدارانی داعش هێرشیان كردووەتە سەر كاروانێكی ئۆتۆمبێل كە ژمارەیەكی زۆر كرێكاری تیادا بووە و بە سەرپەرشتی شەبیحەكانی سووریا بۆ كۆكردنەوەی دۆمەڵان لە بیابانی باشووری دێرزوور دەچوون، بەو هۆیەوە زیاتر لە 40یان كوژراون، كە كرێكاری ژن و منداڵیان تیادا بووە، هەروەها 13 ئۆتۆمبێل سووتاون.
وەڵام بدەوه