گوتەبێژی وەزارەتی ئاوەدانکردنەوە و نیشتەجێکردنی حکوومەتی ھەرێمی کوردستان گوتی، بەبڕیاری سەرۆکی حکوومەتی ھەرێمی کوردستان ئەو ٩ ھەزار یەکەی نیشتەجێبوونەی کە بەھۆی قەیرانی دارایی وەستابوون تەواو دەکرێن و بەسەر ھاووڵاتی ھەژار و کەمدەرامەت دابەش دەکرێن.
مەریوان مەلا حەسەن، بۆ ماڵپەڕی فەرمیی پارتی دیموکراتی کوردستان گوتی: "ئێمە وەکو وەزارەتی ئاوەدانکردنەوەی حکوومەتی ھەرێمی کوردستان ٩ ھەزار یەکەی نیشتەجێبوونمان ھەیە کە خۆی لەچەند پڕۆژەیەک دەبینێتەوە لە ھەرێمی کوردستان و ھەر یەکەیان بەڕێژەیەک تەواوبووە و ھەیە سەدا ٩٠% و ھەیە ٨٥% و ھەشە کەمتر تەواو بووە، بۆیە ھەوڵەکان بەردەوامە بۆ تەواوکردنی ئەو یەکانە کە بەھۆی نەبوونی بوودجە تەواو نەکراون، بەڵام سەرۆکی حکوومەتی ھەرێمی کوردستان بڕیاریداوە پێویستە بەزووترین کات و لەماوەی ئەم کابینەیە تەواو بکرێن و بەسەر ھەژار و کەمدەرامەتان دابەش بکرێن".
گوتەبێژی وەزارەتی ئاوەدانکردنەوە و نیشتەجێکردنی حکوومەتی ھەرێمی کوردستان گوتیشی: "ئەو یەکانە ئێستا بۆ کەس دەرنەچووە کە تەواو بوو ئەوکات بەسەر ھاووڵاتی کەمدەرامەت و ھەژار دابەش دەکرێت بەشێوەی تیروپشک و بڕیارە پارەی بۆ تەرخان بکرێت و دەست بە تەواوکردنیان بکرێت".
وەڵام بدەوه