بەبڕیاری وەزیری ئاوەدانەکردنەوە وادەی پڕکردنەوەی فۆڕمێک درێژدەکرێتەوە

وەزارەتی ئاوەدانکردنەوە و نیشتەجێکردنی حکومەتی هەرێمی کوردستان رایگەیاند، بە بڕیاری دانا عەبدولکەریم، وەزیری ئاوەدانکردنەوە و نیشتەجێکردن وەک دەرفەتێک بۆ زیاتر رەخساندنی هەلی کار بۆ هاووڵاتییان، وادەی پڕکردنەوەی فۆڕمی یەکەی نیشتەجێبوون بۆ خێزانە کەمدەرامەتەکان بۆ ماوەی مانگێکی دیکە درێژ دەکرێتەوە.

ئەمڕۆ شەممە رێککەوتی 30-12-2023، بەبڕیاری وەزیری ئاوەدانکردنەوە و نیشتەجێکردن پڕۆسەی پڕکردنەوەی فۆڕمی یەکەی نیشتەجێبون بۆ ماوەی مانگێک و تاوەکو 1-2-2024 درێژکرایەوە، ئەمەش بەمەبستی کارئاسانیکردن بۆ ئەو کەسانەی کە تاوەکو ئێستا بەهەر هۆکارێک بێت نەیانتوانیوە فۆڕمەکە پڕ بکەنەوە.

رێککەوتی 8/8/2023، لە دوای تەواوکردنی رێکار و ئامادەکارییەکان، وەزیری ئاوەدانکردنەوە و نیشتەجێکردن لە رێوەرەسمێکدا پرۆسەی دابەشکردنی فۆڕمی یەکەی نیشتەجێبوونی بۆ خێزانە کەمدەرامەتەکان راگەیاند، کە زیاتر لە نۆ هەزار یەکەی نیشتەجێبوونە کە لە چوارچێوەی یاسای نیشتەجێبووندا دروستکراون، بەشێکیان تەواوکراون و بەشێکیان کارکردن تیایاندا بەردەوامە.