ئەمڕۆ لە شاری هەولێر كۆبوونەوەیەكی باڵا لە نێوان وەزارەتی پێشمەرگە و ڕاوێژکارانی باڵای هاوپەیمانی نێودەوڵەتی لە هەرێمی کوردستان،بەڕێوە چوو و لەمیانەدا پرسی چاکسازی و رێکخستنەوە و یەکخستنەوەی هێزەکان و هاوکارییەکانی هاوپەیمانان بۆ وەزارەتی پێشمەرگە گفتوگۆی لەبارەوە کرا.
لە راگەیەندراوێكی وەزارەتی پێشمەرگەدا ئاماژەی بە ئەوە دراوە، ئەمڕۆ ١٠ی کانوونی یەکەمی ٢٠٢٣ ، شۆڕش ئیسماعیل، وەزیری پێشمەرگەی حکوومەتی هەرێمی کوردستان پێشوازیکرد لە جەنەڕاڵ مەکێنزی بەرپرسی تیمی باڵای ڕاوێژکارانی هاوپەیمانان و کۆڵۆنێڵ مایکڵ گاچێرۆ بەرپرسی ئۆفیسی هەماهەنگی کونسوڵخانەی ئەمریکا و ڕاوێژکارانی باڵای وڵاتانی هاوپەیمانی نێودەوڵەتی لە هەرێمی کوردستان. وەزیری پێشمەرگە لەو کۆبوونەوەیەدا جەختیکردەوە؛ لە خێراترکردنی پرۆسەی چاکسازی و پێکەوە کارکردن بۆ سەرخستنی ئەو پرۆسەیە و رێکخستنەوە و یەکخستنەوەی هێزەکان لە چوارچێوەی وەزارەتی پێشمەرگەدا.
لە كۆبوونەوەكەدا کە بریکاری وەزارەت و سەرۆکی ئەرکان و ئەمینداری گشتی و فەرماندەی فەرماندەیی هێزەکانی حەفتا و هەشتای پێشمەرگە و ئەفسەرانی پلەباڵای وەزارەتی پێشمەرگە ئامادەی بوون. وەزیری پێشمەرگە بە گرنگیەوە باسی لە پرۆسەی چاکسازی و هەنگاوەکانی ڕێکخستنەوە و یەکخستنەوەی هێزی پێشمەرگەی کوردستانی کرد. ڕایگەیاند: "بە هاوکاری و هەماهەنگی زیاتر لەگەڵ دۆستەکانمان لە هێزەکانی هاوپەیمانان، هەوڵبدەین هێزەکان رێكبخەینەوە بە ئامانجی دروستبوونی هێزێکی نیشتیمانی تۆکمە و رێکخراو، خاوەن دیسپلینی سەربازی لە ژێر چەتری وەزارەتی پێشمەرگەدا کە ساڵانێکە لەم پێناوەدا هەوڵی جددی بۆ دەدەین. هەروەها وتیشی:دڵخۆشین، ویست و ئیرادەیەکی بەهێز هەیە بەرامبەر پرس و پرۆسەی چاکسازی لە وەزارەتی پێشمەرگەدا
لە راگەیەندراوەكەدا هاتووە "بەرپرسی تیمی باڵای ڕاوێژکارانی هاوپەیمانان لە هەرێمی کوردستان ، دڵخۆشی خۆی دەربڕی بەرامبەر خێراکردنی هەنگاوەکانی چاکسازی لە وەزارەتی پێشمەرگە. ڕایگەیاند: ئێمە لە هاوپەیمانی نێودەوڵەتی پاڵپشت و پشتیوانتان دەبین لە پرۆسەی چاکسازی و یەکگرتنەوەی هێزەکانی حەفتا و هەشتا و پەرەپێدان بە کاروباری فیرقەکان لە وەزارەتی پێشمەرگە ، لەم پێناوەشدا پێکەوە کاری هاوبەش و پلانی گرنگ و ستراتیژی دادەڕێژین."
هەروەها گوتیشی: "هاوپەیمانان چاودێری وردی پرۆسەی چاکسازی دەکەن لە وەزارەتی پێشمەرگە و هیوادەخوازن هێزی پێشمەرگە بگاتە ئاستێکی باڵای سەربازی."
لە کۆتایی کۆبوونەوەکەدا، گفتگۆی چڕ و پڕبایەخ کرا دەربارەی پەرەپێدان بە کاروباری فیرقەکان و پلانی یەکگرتنەوەی هێزەکان و ستراتیژیەتی وەزارەتی پێشمەرگە لە داهاتوودا.
وەڵام بدەوه