لەبارەی دابەشکردنی بەشەخۆراکی نوێ زانیاری گەیشت

وەزارەتی بازرگانی هەرێمی كوردستان وردەكاری دابەشكردنی بەشەخۆراكی دەیەمی هاووڵاتییان ئاشكرا دەكات و جەختیش دەكاتەوە سبەی دەست بە دابەشكردن دەكرێت.

بەرێوەبەرایەتیی بازرگانی کەلوپەلی خۆراکی هەولێر لە راگەیاندراوێكدا بڵاوی كردەوە: "ئاگاداری بریکارەکانی خـۆراکی سنـووری پارێزگای هەولێر دەکەینەوە، دوکانەکانیان ئامادە بکەن، چونکە لە بەیانی ڕۆژی چوارشەممە 6/12/2023، بەشە خۆراکی نوێ دەستپێدەکات و سەرەتا بە دابەشکردنی برنج دەستپێدەکات

ئاماژی بەوەش داوە، بەشە خۆراکی سەبەتەی دەیەمی ساڵی 2023، بۆ هەر نەفەرێک پێکهاتووە لەم بابەتانە:

- زەیتی (الدار) یەك لیتر.

- دۆشاوی تەماتە، قوتی بچوک (400 گرام).

- شەکر یەك كیلۆ گرام.

- نیسک 500 گرام (نیو کیلۆ).

- برنج سێ كیلۆ.

- (شەکر و نیسک زیادەی 1%).

- (برنج زیادەی 2%).

رۆژی 2ی12ی2023، دلێر عەبدولواحید، بەڕێوەبەری دابەشکردنی خۆراک لە هەولێر، ڕاگەیاند: دابەشكردنی بەشەخۆراكی نۆیەمی ئەمساڵی هاووڵاتییان تەواو كراوە و دەست بە دابەشكردنی بەشەخۆراكی دەیەمی ئەمساڵ دەكەین.

ئاماژەی بەوەش دا: ڕۆژانە باری مادەكانی خۆراك دەگەن بە كۆگاكانمان و پرۆسەكە بەردەوامە و ئەم هەفتەیە دەست بە دابەشكردنیان دەكرێت .جەختیشی كردەوە، سەرەتا خۆراكەكان لە شوێنە دوورەكان دابەش دەكرێت، پاشان لە دەوروبەر و ناوشار.

باسی لەوەش كرد: "هاوشێوەی بەشەخۆراكی نۆیەم، دوو جۆر برنجی باش، كە برنجی ئەمریكی و برنجی تایلەندیین، دابەش دەكرێت. بەڕێوەبەری دابەشکردنی خۆراک لە هەولێر ئاشكراشی كرد، بەشەخۆراكەكان دوای ئەوەی پشكنینیان بۆ دەكرێت، دەدرێنە بریكارەكانی خۆراك و ئەوانیش بەسەر هاووڵاتییاندا دابەشی دەكەن