شەپۆلێکی دیکەی بەفروباران ھەرێمی کوردستان دەگرێتەوە

شارەزایەکی بواری کەشناسی ئاشکرای کرد کە شەپۆلێکی دیکەی بەفروباران هەرێمی کوردستان و وڵاتانی ناوچەکە دەگرێتەوە.

ئەمڕۆ چوارشەممە 29/11/2023، ئاراس جەبار، شارەزای بواری کەشناسی بڵاوی کردەوە: "لە سبەی پێنجشەممەوە بەتایبەت دوو سبەی ھەینی بەھۆی کاریگەری بارستە ھەوایەکی گەرم و ناوبەناو ھاتنی رێژەیەکی کەم شێ کە لە باشووری رۆژئاوای ناوچەکەوە درێژ دەبێتەوە بۆ سەر ناوچەکانمان پلەکانی گەرما بەرزبوونەوە بەخۆیەوە دەبینێت و تا کۆتایی ھەفتەی ئاییندە کاریگەرییەکانی دەمێنێتەوە."

ئاماژەشی بەوە داوە: "لەو ماوەیەدا بەرزترین پلەی گەرمی سەنتەری پارێزگاکانی ھەرێمی کوردستان بەم شێوەیە پێشبینی دەکرێت (ھەولێر لەنێوان 19-21 پلە، سلێمانی 18-20 پلە، دھۆک 18-19 پلە، ھەڵەبجە 19-21 پلە، کەرکووک 20-23 پلە) بە زۆری ئاسمانی ھەرێمی کوردستانیش ساماڵ دەبێت و ھەندێک کاتیش پەڵە ھەور دروست دەبێت."

ئەوەشی خستووەتە روو: "لە چوارشەممەی ھەفتەی ئایندەوە 6/12/2023، کاریگەری نزمە پاڵەپەستۆیەکانی دەریای سوور و ناوەراست قۆناغ بە قۆناغ بۆ سەر ناوچەکانمان دەستپێدەکاتەوە، سەرەتاش بە لاوازیی و بە ھەورەبرووسکە و بارانی ناجێگیر و پەرتەوازە کاریگەری دەبێت دواتر لەنێوان 10 بۆ 15ی مانگی داھاتوو پێشبینی دەکرێت کاریگەری نزمەپاڵەپەستۆ و بارستە ھەواساردەکان چالاکتر ببێت و شەپۆلی بەفر و بارانبارین بەرێژەی زۆر و باش ھەرێمی کوردستان و وڵاتانی ناوچەکە بگرێتەوە