بەرپرسێكی وەزارەتی سامانە سروشتییەکان لەبارەی پڕۆسەی دابەشكردنی نەوتی ماڵان ڕوونكردنەوە دەدات و دەڵێت: "ئەگەر بێت و بەغدا بڕی پێویستی نەوت بۆ هەرێمی كوردستان بنێرێت، دەتوانین دوو بەرمیل نەوت بۆ هەر خێزانێک دابین بکەین.
ڕێبین زەنگەنە، بەڕێوەبەری گشتیی دیوانی وەزارەتی سامانە سروشتییەکان، بە (فەرمانگەی میدیا و زانیاری)ی ڕاگەیاند: "لە ناوچە شاخاوییەکاندا نەوت دابەش کراوە و ئێستا لە ناوەندی شارەکاندا دابەشی دەکەین. بەوەش تا ئێستا 620 هەزار خێزان لە دابەشکردنی 125 ملیۆن لیتر نەوت سوودمەند بوون.
ئاماژەی بۆ ئەوەش کرد: لە سەرەتای ئەمساڵەوە داوامان کردووە حکوومەتی فیدراڵی، نەوتی پێویست بۆ هەرێمی کوردستان بنێرێت، بەڵام ئەرکی خۆی جێبەجێ نەکردووە؛ ئەگەر بێت و بڕی پێویست بۆ هەرێمی كوردستان بنێرێت، بێگومان دەتوانین دوو بەرمیل نەوت بۆ هەر خێزانێک دابین بکەین.
بەڕێوەبەری گشتیی دیوانی وەزارەتی سامانە سروشتییەكانی حكوومەتی هەرێمی كوردستان، ڕاگەیاندبوو: وەزارەتی سامانە سروشتییەكان لەگەڵ كۆمپانیاكانی نەوت گرێبەستمان كردووە و بە نرخێكی پاڵپشتیكراو ئەو نەوتە بەسەر هاووڵاتیاندا دابەش دەكرێت و ئەو نەوتەی دابەش دەكرێت هیچ پەیوەندیی بە بەغداوە نییە.''
لای خۆیەوە نەبەز عەبدولحەمید، قایمقامی ناوەندیی هەولێر، ڕاگەیاند: بەغدا نەوتی نەناردووە، ئەو نەوتەی هەیە حكوومەتی هەرێمی كوردستان بە گران لە ڕێگەی كۆمپانیاكان كڕیویەتی و بە نرخی پاڵپشتی و بە هەرزان دەیداتەوە هاووڵاتییان.
وەڵام بدەوه