لەو سنورە بەفربارین دەستپێدەکات

ئاراس جەبار،شارەزای بواری كەشناسی، ئەمڕۆ سێشەممە  پێشبینی و زانیارییەكانی سەبارەت بەكەشی ڕۆژانی داھاتوو بڵاوكردەوە و رایگەیاند: سەرەتا كاریگەری ئەو نزمەپاڵەپەستۆیەی ڕووی لەناوچەكانمان كردووە بۆ ئەمڕۆ تا كاتەكانی ئێوارە بەردەوامی ئەبێت بەتایبەت لەناوچە شاخاوییەكان و ناوچە سنورییەكانی باكوور و باكوری رۆژھەڵاتی ھەرێم بە بارانی مامناوەند و پچڕ پچڕ و بارینی بەفر لەناوچە سنورییەكاندا .
 هەروەها دەڵێت: ھەر لەئەنجامی كاریگەری ئەو بارستە ھەوا ساردەوە پێشبینی ئەكەین كاتەكانی ئەمشەو بۆ بەرەبەیانی سبەی چوارشەمە 22/11 پلەكانی گەرما بەرێژەیەكی بەرچاو نزمببێتەوە و لەناوچە شاخاویەكاندا بۆ سفر پلەی سەدی دابەزێت و بەستن ڕووبدات .
دەشڵێت: لە سبەی چوارشەمەوە 22/11 ھەرێمی كوردستان و وڵاتانی ناوچەكە تا ھەفتەی ئایندە دەكەوێتە ژێر كاریگەری ناوچەیەكی پەستان بەرزەوە كە لەسەر ناوچەكانی دەریای ناوەراست و توركیا دروست ئەبێت و لەو ماوەیەدا ئاسمانی ھەرێم بەزۆری ساماڵ و ھەندێك كاتیش بۆ نیمچە ھەوری بەرز ئەگۆرێت ، پلەكانی گەرماش سبەی بەڕاورد بە ئەمڕۆ بەرێژەی 1 تا 3 پلە بەجیاوازی ناوچەكان بەرزبوونەوە بەخۆیەوە ئەبینێت و دوو سبەی پێنجشەمەش 23/11 بەرێژەیەكی زیاتر بەڕاورد بە سبەی بەرزدەبێتەوە ، خێرایی با لەماوەی ئاماژەپێكراودا بەزۆری لەسەرخۆ ئەبێت لەنێوان 5-15كم لە كاتژمێرێكدا .
ئاماژەی بەوەشدا، لەئەگەری ڕوونەدانی گۆڕانكاری پێشبینی دەكرێت ھەفتەی ئایندە لەرۆژانی 26 و 27ی مانگ نزمەپاڵەپەستۆیەك لە باكوری ئەوروپاوە بۆ سەر ناوچەكانمان بەكاریگەری جیاواز درێژببێتەوە كە بەگوێرەی گۆڕانكاری ئێستا شەپۆلێكی لاواز بۆ مامناوەندی بارانبارین ئەبێت زیاتر كاریگەری لەسەر ناوچەكانی باكوری ھەرێم دروست ئەكات.