ئەمڕۆ 19/10/2023 سەرۆکی حکومەتی ھەرێمی کوردستان مەسرور بارزانی له ڕێوڕهسمی دهرچوانی خولێكی پۆلیس له ههولێر، وتارێكی پێشكهش كرد، کە ئهمه دهقی وتارهكهیهتی:
بە ناوی خوای گەورە و میهرەبان
ئامادەبوانی هێژا ئەم كاتەتان باش.
پیرۆزباییەكی گەرم ئاراستەی گشت دەرچوانی ئەم خولە دەكەم، هیوادارم ئەنجامدانی ئەم خولە و ئەم جۆرە خولانە ببنە هۆی زیاتر پەرەپێدان و بەهێزكردن و پێشخستنی تواناكانی كارمەندانی پۆلیس. ڕێز و پێزانینی زۆرم بۆ هێزەكانی ئاسایشی ناوخۆ هەیە، دەستخۆشییان لێ دەكەم بۆ ماندووبوون و شەونخوونی و دڵسۆزی و كارامەییان لە بەجێگەیاندنی ئەركەكانیان لە پێناو ئاسایش و سەقامگیریی هەرێمی كوردستان.
من خۆم لە نزیكەوە شاهێد و ئاگاداری هەوڵ و خزمەتی بەرچاوی پۆلیس و هێزەكانی ئاسایشی ناوخۆم كە زۆر خۆنەویستانە و لە بارودۆخی سەخت و دژواردا ئەركەكانیان رادەپەڕێنن.
بەشێكی گرنگی ئەركی كارمەندانی پۆلیس و هێزەكانی ئاسایشی ناوخۆ، پاراستنی ئاسایش و تەناهی و دابینكردنی ئارامی و سەقامگیری و نەهێشتنی تاوان و ڕووبەڕووبوونەوەی تاوانبارانە. لەوەش گرنگتر ئەوەیە كە چۆن بە شێوەیەكی یەكسان و دادپەروەرانە و لە چوارچێوەی یاسا و ڕێزگرتن و پاراستنی مافەكانی مرۆڤ، مامەڵە و هەڵسووكەوت لەگەڵ هاووڵاتیان بە گشتی دەكەن و چۆن سەرپێچیكاران و تاوانبارانیش ملكەچی بەردەم دادگا دەكەن؟
هەروەها كارمەندانی پۆلیس كە نوێنەرایەتیی دەسەڵات و باڵادەستبوون و سەروەریی یاسا دەكەن، دەبێ نموونەیەكی جوان و گەشی دەسەڵات بن لای هاووڵاتیان، بە تایبەتی كە ئێوە رۆژانە لە نزیكەوە پەیوەندیی راستەوخۆتان لەگەڵ خەڵكدا هەیە، پێویستە لە رەفتاركردن لەگەڵ خەڵك، خۆتان لە توندوتیژی و ئەزیەتدان و زوڵم و ستەم و هەموو كارێكی نایاسایی بەدوور بگرن. هاونیشتمانییان دەبێ ئێوە بە بەشێك لە خۆیان بزانن و هەردوولاتان تەواوكەری یەكتر بن، لە پێناو ئامانجێكی هاوبەش كە ئەویش پاراستنی ئاسایش و سەقامگیریی نیشتمان و سەروماڵی هاووڵاتیانە.
خۆشبەختانە یەكێك لە هۆكارەكانی ئەو ئاسایش و سەقامگیرییەی لە كوردستان هەیە كە بۆتە دەستكەوت و سیمایەكی گەشی هەرێمی كوردستان، بۆ ئەو هەماهەنگی و هاوكارییە و پەیوەندییە بەهێز و توندوتۆڵەی نێوان خەڵكی كوردستان و دەزگا ئەمنییەكان دەگەڕێتەوە.
پۆلیس و هێزەكانی تری ئاسایشی ناوخۆ، نابێ بە هیچ شێوەیەك، هیچ كەمتەرخەمی و نەرمییەك بنوێنن لە بەرامبەر تاوانباران و هەموو ئەوانەی دەیانەوێ ئارامی و ئاسایشی وڵاتەكەمان تێك بدەن و ژیانی هاووڵاتیان بخەنە مەترسییەوە.
ئەمڕۆ جیهان لە پێشكەوتنێكی خێرای تەكنەلۆژیا دایە، پێویستە پۆلیس و هێزە ئەمنییەكان خۆیان لەگەڵیدا رابهێنن و لە راپەڕاندنی ئەركەكانیان سوودی باش لە تەكنەلۆژیا وەربگرن كە بە دڵنیاییەوە ئاسانكارییەكی زۆر بۆ دەزگا پەیوەندیدارەكانی ناوخۆ دەكات و یارمەتیدەرێكی باشیشە بۆ ئەوەی ئامانجەكانیان لە بەدواداچوونی تاوانباران و سەپاندنی یاسا و دابینكردنی ئاسایش و سەقامگیریدا بەدەست بهێنن.
لەم چوارچێوەیەدا ئەنجامدانی خولەكانی مەشقكردن و راهێنان و بەرزكردنەوەی ئاسایشی هۆشیاری و پیشەیی پۆلیس و سەرجەم هێزەكانی ناوخۆ، كارێكی پێویست و گرنگە، هیوادارم لەسەری بەردەوام بن، بۆ ئەوەی بتوانن بە باشترین و شایستەترین شێوە ئەركەكانتان بەجێ بگەیەنن و ئارامی و سەقامگیری بپارێزن.
جارێكی دیكەش پیرۆزبایی دەرچوونتان لێ دەكەم، هیوای سەركەوتن و سەرفرازیتان بۆ دەخوازم، دڵنیام بە پشتیوانیی خوای گەورە و هیممەت و دڵسۆزی و كارامەیی ئێوە، كوردستانمان هەمیشە پارێزراو دەبێت.
زۆر سوپاس.
وەڵام بدەوه