وەزیری شارەوانی و گەشتوگوزار و كونسوڵی ئەمەریكا پرۆژەی شوێنەواری و كولتووری تاوتوێ دەكەن

ئەمڕۆ یەكشەممە 6ی ئاداری 2022 لە دیوانی وەزارەتی، ساسان عەونی، وەزیری شارەوانی و گەشتوگوزار، پێشوازی لە ڕۆبەرت پالەدینۆ، کونسوڵی گشتیی ویلایەتە یەکگرتووەکانی ئەمەریکا لە هەولێر و شاندێكی یاوەری كرد. لە دیدارەكەدا گفتوگۆ سەبارەت بە كاركردنی كۆمپانیا و تیمە ئەمەریكاییەكان لە بواری كولتووری و كەرتی شوێنەوار و پرۆژەی خزمەتگوزاری لە هەرێمی كوردستان كرا كە بڕیارە لایەنی ئەمەریكی پرۆژەی شوێنەواری لە چەند شوێنێک جێبەجێ بكەن.
شایەنی باسە، لایەنی ئەمەریكی چەندین پرۆژەی نۆژەنکردنەوەی شوێنە شوێنەوارییەکانیان لە هەولێر و ئامێدی و لالش ئەنجام داوە و ئێستاش سەرقاڵی جێبەجێكردنی پرۆژەیەكی دیكەی شوێنەوارین، كونسوڵی ئەمەریكاش جەخت دەكاتەوە كە هەرێمی كوردستان وڵاتی پێكەوەژیانە و دەیانەوێت لەم بوارەدا كاری زیاتری تێدا بكەن. لە تەوەرێكی تردا كونسوڵی ئەمەریكا خواستی كاركردنی كۆمپانیا و وەبەرهێنەرانی وڵاتەكەی لە كوردستان خستەڕوو.
ساسان عەونی، وەزیری شارەوانی و گەشتوگوزار خۆشحاڵی خۆی بە كاركردنی پێكەوەیی لەنێوان هەرێمی كوردستان و تیمە ئەمەریكاییەكان دەربڕی و بە ناوی حكوومەتی هەرێمی كوردستان و وەزارەتی شارەوانی و گەشتوگوزاریشەوە سوپاسی هاوكاری و هەماهەنگییەكانی كردن و جەختیشی لەسەر درێژەدان بە پەیوەندییەكان و كاركردنی پێكەوەیی لە بواری كولتووری و شوێنەوار و خزمەتگوزاردا كردەوە، لەبارەی داواكاری كاركردنی كۆمپانیا و وەبەرهێنەرانی ئەمەریكاییش لە كوردستان ئامادەیی حکوومەتی هەرێمی کوردستانی بۆ هەموو جۆرە هەماهەنگی و هاوكارییەك دەربڕی.