بانکی ناوەندی دۆلار بە نرخی فەرمی دەدەین بە هاوڵاتییان

بانکی ناوەندیی عێراق ئەمڕۆ لە ڕاگەیێنراوێکدا باسی لەوەکردووە، تا پێش 7ـی ئەم مانگە بە نرخی پێشوو دۆلار بۆ پێداویستییەکانی دەرەوە دابینکراوە، ئێستاش بۆ دابینکردنی پێداویستییەکانی هاووڵاتیان لە دەرەوە، لە ڕێگەی کارتە بانکییەکانەوە دۆلار بە نرخی فەرمی بە هاووڵاتیان دەدەین.  بانکی ناوەندیی عێراق داواشی لە دەزگاکانی ڕاگەیاندن کرد پێش بڵاوکردنەوەی هەر هەواڵێکی پەیوەست بە بەهای دۆلار و دینار، لە سەرچاوەی فەرمییەوە زانیارییەکان پشتڕاست بکەنەوە، بەپێچەوانەوە ڕێکاری یاسایی دژی ئەوانە دەگرنەبەر کە هەواڵی ناڕاست بڵاودەکەنەوە. پێشتر بانکی ناوەندی 100 دۆلاری بە نرخی فەرمی بە 132 هەزار دینار بۆ گەشتیاران دابین دەکرد، ئێستا ئەم بڕە دەبێتە 152 هەزار دینار بۆ هەر 100 دۆلارێک، بەگوێرەی ڕێنماییەکانی بانکی ناوەندی عێراقیش بەپێی جۆری کارتی بانکەکە و جۆری بانکەکە ڕێنماییەکانی ڕاکێشانی پارە لە دەرەوەی عێراق دەگۆڕێن و جیاوازن، بەڵام بەگشتی بەم جۆرەن:  بۆ نمونە ئەو کارتانەی پەیوەستن بە هەژماری بانکییەوە، دەکرێت ڕۆژانە تا 500 دۆلار ڕابکێشێرێت بەڵام نابێت مانگانە لە سێ هەزار دۆلار زیاتر ڕابکێشێرێت.
 ئەو کارتە بانکییانەش کە بە هەژماری بانکییەوە نەبەستراونەتەوە توانای ڕاکێشانی پارە لێیان کەمترە، لەم جۆرە کارتانەدا ڕۆژانە تا 100 دۆلار دەتوانیت پارە ڕابکێشیت، مانگانەش نابێت لە ملیۆنێک و 500 هەزار دینار زیاتر پارە ڕابکێشرێت.