پێنج بڕیاری گرنگ لە عەلی زەیدییەوە

ئەمڕۆ یەکشەممە، عەلی زەیدی، سەرۆکوەزیرانی عێراق سەرپەرشتی کۆبوونەوەیەکی فراوانی کردووە، فالح ساری، وەزیری دارایی، پارێزگاری بانکی ناوەندی و کۆمەڵێک ڕاوێژکار و بەڕێوەبەری گشتی و هەر بەرپرسێک پەیوەندی بە پارە و ئابوورییەوە هەبووە بەشدار بووە. نووسینگەی سەرۆکوەزیرانی عێراق بڵاوی کردووەتەوە لە کۆبوونەوەکە پێنج بڕیار دراون کە ئەمانەن؛
یەکەم؛ بڕی یەک تریلیۆن دینار تەرخان دەکرێت بۆ پێدانی قەرزی خانووبەرە و نیشتەجێبوون بە خەڵک. ئەم قەرزە خەڵکی کەرکووک و سنووری ماددەی 140 دەگرێتەوە، بەڵام دیار نییە شمولی خەڵکی کوردستان دەکات یان نا.
دووەم؛ تەرخانکردنی بڕی یەک تریلیۆن دینار بۆ کەرتی پیشەسازی، پارەکە بۆ پێدانی قەرزی درێژخایەن دەدرێت بۆ دروستکردنی پڕۆژە پیشەسازییەکان
سێیەم؛ بڕی 500 ملیار دینار بۆ پارەی گەنمی جووتیاران و پاڵپشتیکردنی کەرتی کشتوکاڵ تەرخان کراوە. ئەم پارەیە جووتیارانی کوردستانیش دەگرێتەوە، بەشێکی بۆ قەرزی ساڵی ڕابردووی گەنم خەرج دەکرێت کە پارەی جووتیارانی کوردستان هێشتا نزیکەی حەوت ملیار دیناری ماوە، ئەوەی تریشی بۆ گەنمی ئەمساڵ خەرج دەکرێت
چوارەم؛ بڕی 500 ملیار دینار بۆ بەڵێندەران و کۆمپانیاکان خەرج  دەکرێت، ئەوانەی پرۆژەیان لە حکومەت وەرگرتووە و تاوەکو ئێستا پارەیان بۆ خەرج نەکراوە.
پێنجەم؛ بڕی 500 ملیار دینار تەرخان دەکرێت بۆ سندووقی نەوەکانی داهاتوو، ئەم پارەیە لە داهاتی نەوت دابین دەکرێت و بۆ سندووقەکە زیاد دەکرێت کە چەند ساڵێکە دانراوە، پارەکەش هەڵدەگیرێت بۆ نەوەکانی داهاتوو.
عەلی زەیدی، سەرۆکوەزیرانی عێراق لە کۆبوونەوەی ئەمڕۆ فەرمانی کردووە بەزووترین کات بڕیارەکان جێبەجێ بکرێن بۆ ئەوەی جووڵە بکەوێتەوە بازاڕ و پرۆژەکان.