فەرمانێک لە سەرۆک وەزیرانی عێراقەوە

دوای ئەوەی لە بەرەبەیانیی دوێنێ یەكشەم هەڵمەتێكی فرەوانی گرتنی بەرپرس و پەرلەمانتارانی عێراق دەستی پێ كرد لەوانەی بە تێوەگلان لە گەندەڵی تۆمەتبارن، دەست بەسەر بڕە پارەیەكی زۆری ئەوان گیراوە، گوتەبێژی حكوومەتی عێراق ئاماژە دەكات كە سەرۆك وەزیران فەرمانی داوە بە كردنەوەی حیسابێكی بانكی بۆ ئەو پارانەی لە تێوەگلاوان وەردەگیرێتەوە.
حەیدەر عەبوودی گوتەبێژی حكوومەتی عێراق رای گەیاند، عەلی زەیدی سەرۆك وەزیران فەرمانی داوە بە وەزارەتی دارایی بۆ كردنەوەی حیسابێكی بانكی بۆ دانانی ئەو بڕە پارەی لە تێوەگلاوان لە گەندەڵی وەردەگیرێتەوە، ئاماژەی كرد كە حكوومەت لە ئەركە دەستوورییەكانی بۆ پاراستنی سامانی گشتی و زیادكردنی توانای دەوڵەت بۆ بەجێگەیاندنی ئەركەكانی بەردەوام دەبێت.  
روونی كردەوە، لە ئیدارەدانی ئاڵنگارییەكان و چاكسازیی دامەزراوەیی و رووبەڕووبوونەوەی گەندەڵیدا، حكوومەت دیدێكی گشتگیر پیادە دەكات، دووپاتی كردەوە كە هەڵمەتی "فەجر"، گرتنی 21 تۆمەتباری لێ كەوتەوە و هەندێكیش راوەدوو دەنرێن، سەبارەت بە پرۆسەی داماڵینی چەكی نایاسایی گوتی، كۆتایی مانگی ئەیلوولی داهاتوو دوا وادەیە بۆ رادەستكردنی چەك، كە هاوكاتە لەگەڵ كشانەوەی تەواوەتیی هێزەكانی هاوپەیمانی نێودەوڵەتی لە عێراق، جارێكی تر دووپاتی كردەوە كە هەڵمەتی "فەجر"، بەردەوام دەبێت و ناوەستێت. 
عەبوودی رای گەیاند كە دداننانی تۆمەتبارە گیراوەكان تۆڕی تر و ناو و بڕە پارەی زیاتر ئاشكرا دەكات، سەبارەت بە هێنانی تەرمی عەلی خامنەیی رابەری باڵای پێشووی ئێران بۆ نەجەف و كەربەلا گوتی، حكوومەتی عێراق بە داوایەكی ئێران بۆ هێنانی تەرمەكەی بۆ عێراق لە 8ی تەمووزی داهاتوو رازی بووە، سەبارەت بە مووچەی فەرمانبەرانی هەرێمیش دووپاتی كردەوە كە رێككەوتن و لێكگەیشتن لە نێوان بەغدا و هەولێر لەبارەی مووچەوە هەیە و پابەندبوون بە دابینكردنی جێگیرە.