هۆکاری سەردانی سوودانی بۆ تورکیا ئاشکرابوو

وەزیری گواستنەوەی توركیا ڕای گەیاند، لە چەند ڕۆژی داهاتوودا محەمەد شیاع سوودانی، سەردانی توركیا دەكات و ئەردۆغانیش سەردانی عێراق دەكات.

ئەمرۆ چوارشەم دووی نیسان، عەبدولقادر ئورالئۆغڵو وەزیری گواستنەوەی توركیا، بۆ میدیاكانی توركیا ئاشكرای كرد، لە چەند ڕۆژی داهاتوودا محەمەد شیاع سوودانی سەرۆك وەزیرانی عێراق، سەردانی توركیا دەكات.

گوتیشی: ڕەجەب تەیب ئەردۆغان سەرۆك كۆماری توركیا، لە ماوەی دوو مانگی داهاتوودا سەردانی عێراق دەكات و تاوتوێی چەند پرسێك دەكەن، دیارترینیان پڕۆژەی ڕێگەی گەشەپێدانە كە ئورالئۆغڵو ڕای گەیاندووە، گەیشتووەتە قۆناغی پێشكەوتوو.

وەزیری گواستنەوەی توركیا دەشڵێت، قۆناغێكی بەرچاو لە پڕۆژەی ڕێگیی گەشەپێدان بەدی هاتووە، كە توركیا بە بەندەری فاو لە كەنداوی عەرەبی لە ڕێگەی هێڵی ئاسنین و ڕێگەی خێرای 1200 كیلۆمەتریی دەبەستێتەوە.

ئاماژەی بەوەش كرد، ئەگەری چالاككردنی كەرتی تایبەت هەیە لەبارەی لایەنی دارایی ڕێگەی گەشەپێدان، هەروەها پاڵپشتی دارایی لە قەتەر و ئیمارات و دامەزراوە داراییە نێودەوڵەتییەكان دەبێت.

وەزیری گواستنەوە ڕاشی گەیاند، "محەمەد شیاع سوودانی لە چەند ڕۆژی داهاتوودا سەردانی وڵاتەكەمان دەكات. هەرچەندە وادەی سەردانەكە یەكلا نەكراوەتەوە، بەڵام ڕەجەب تەیب ئەردۆغان سەرۆك كۆمار بەهەمانشێوە بەنیازە لە دوو مانگی داهاتوودا سەردانی عێراق بكات، پێشبینیش دەكەین ئەو بڕیارانەی لەم سەردانانەدا دەدرێن، پێوەست بن بە ڕێككەوتنەكانی پێشووەوە."