سوودانی بڕیاریی كۆتایی داوە

میدیا عێراقییەكان ئاشكرایان كرد، محەمەد شیاع سوودانی سەرۆك وەزیرانی عێراق، لە ڕێگەی پێكهێنانی هاوپەیمانێتیی سیاسی، بۆ هەڵبژاردنی داهاتووی عێراق خۆی كاندید دەكاتەوە.

ئەمڕۆ پێنجشەم 27ـی ئادار، میدیاكانی عێراق بڵاویان كردەوە، محەمەد شیاع سوودانی بۆ هەڵبژاردنی داهاتووی عێراق، لە ڕێگەی هاوپەیمانێتیی سیاسییەوە هەموو هەوڵەكانی دەخاتەگەڕ بۆ بردنەوەی ویلایەتێكی تری حوكمڕانیی لە عێراق، بۆ ئەو مەبەستەش خۆی یەكلا كردووەتەوە و بڕیاریی كۆتایی داوە.

دەشڵێن، چانسی محەمەد شیاع سوودانی بۆ گەڕێكی تری سەرۆكایەتیی ئەنجوومەنی وەزیرانی عێراق زۆر لاوازە.

ئێستە كۆمسیۆنی هەڵبژاردنەكانی عێراق سەرقاڵی ئامادەكارییە بۆ هەڵبژاردنی داهاتوو، بەپێی گوتەی بەرپرسان، بۆ ئەو هەڵبژاردنە 29 ملیۆن عێراقی دەتوانن دەنگ بدەن.

عومەر ئەحمەد سەرۆكی كۆمسیۆنی عێراق لە دواین لێدوانیدا رای گەیاند، هەڵبژاردنەكان 45 ڕۆژ پێش كۆتاهاتنی خولی ئێستەی پەرلەمانی عێراق دەبێت، كە یەكەم دانیشتنی خۆی لە نۆی كانوونی دووەمی 2021 دەست پێ كردووە.