سەرچاوەیەكی باڵا لە وەزارەتی گواستنەوەی عێراق ئاشكرای كرد كە ئەمەریكا عێراقی لە ئەگەری بەكارهێنانی تاران بۆ هێڵی ئاسمانیی عێراق بۆ گواستنەوەی پارە و راوێژكارە سەربازییەكانی بۆ لبنان وریا كردووەتەوە، ئەوەش لە دوای سەپاندنی قەدەغەی نیشتنەوەی فڕۆكە ئێرانییەكان لە بەیرووت.
بەپێی سەرچاوەكە واشنتن عێراقی ئاگەدار كردووەتەوە بەوەی دەبێت رێگری لە هەوڵەكانی ئێران بكات بۆ سوودوەرگرتن لە هێڵی ئاسمانیی عێراق بۆ گەیاندنی پاڵپشتیی دارایی و لۆجیستی بۆ بەیرووت و گەیاندنی بە حزبوڵای لبنانی، پێدەچێت ئەمەریكا پێش رووداوەكان بكەوێت، لە دوای ئەوەی دەسەڵاتدارانی لبنان قەدەغەی نیشتنەوەی فڕۆكەكانی ئێرانیان سەپاند.
سەرچاوەكە دووپاتی كردەوە كە عێراق پابەندە بە هەموو رێنوێنییە نێودەوڵەتییەكانی تایبەت بە ئاسایشی گواستنەوەی ئاسمانی و رێزگرتن لە سەروەریی وڵاتان، رێگەش بەوە نادات هیچ لایەنێكی ناوخۆیی و دەرەكی ئاسمان و خاكەكەی بۆ تێپەڕاندنی ئەجیندای نێودەوڵەتی بەكاربێنێت.
دوای ئەوەی بەم دواییە حكوومەتی لبنان قەدەغەی نیشتنەوەی فڕۆكەكانی ئێرانی لە بەیرووت سەپاند، وەك جێبەجێكردنی بڕگەیەكی رێككەوتنی ئاگربەست لە لبنان بە رێگرتن لە گەیشتنی پاڵپشتی بۆ حزبوڵا لە رێگەی فڕۆكەخانەی بەیرووتەوە، ئەو بڕیارە ناڕەزایەتییەكی گەورەی ئەندامانی حزبوڵای لبنانی لێ كەوتەوە، شارەزایان هۆكاری ئەو قەدەغەكردنە بەوە لێك دەدەنەوە كە ئێران دوای لەدەستدانی هیڵی وشكانی، دەیەوێ لە رێگەی ئاسمانییەوە پارە و یارمەتی بگەیەنێتە حزبوڵای لبنانی، كە ئێستە بە دۆخێكی خراپدا تێپەڕ دەبێت، بۆیە رەنگە پەنا بۆ سوودوەرگرتن لە گەشتە ئاسمانییەكانی عێراق وەربگرێت بۆ ئەو مەبەستە.
وەڵام بدەوه