ئەمەریکا هۆشداری دایە حکومەتی عێراق

بەپێی هەواڵێکی ئاژانسی ڕۆیتەرز، ماتیۆ میلەر، گوتەبێژی وەزارەتی دەرەوەی ئەمریکا ڕایگەیاندووە، ویلایەتە یەکگرتووەکانی ئەمریکا 120 ڕۆژ بۆ كڕینی كارەبا لە ئێران لەلایەن عێراقەوە نوێ دەكاتەوە، کە ڕێگە بە عێراق دەدات لە بەرانبەر كارەبادا، پارە بدات بە ئێران.
واشنتۆن ساڵی ڕابردوو دەستی کرد بە دەرکردنی لێخۆشبوون و جەختی لەوە کردەوە ئەو پارانە تەنیا دەتوانرێت بۆ مامەڵەی ڕێگەپێدراو بێت، وەک کڕینی کەلوپەلی مرۆیی، لەوانەش خۆراک و بەرهەمە کشتوکاڵییەکان.
وێستگەکانی کارەبای عێراق زۆر پشت بە غازی ئێران دەبەستن، بەڵام بە هۆی سزاکانی ئەمریکا بۆ سەر تاران، بەغدا ناتوانێت ڕاستەوخۆ پارەی هاوردەکردنی غاز بدات، بەڵکوو دەبێت تاران ئەو پارەیە بۆ کڕینی خۆراک یان کەلوپەلی تەندروستی بەکار بهێنێت.
هەرچەندە عێراق وڵاتێکی نەوتییە، بەڵام لە بواری وزەدا زۆر پشت بە ئێران دەبەستێت، چونکە بەهۆی ژێرخانی وێرانی وڵاتەكەوە، یەک لەسەر سێی پێویستیی غاز و کارەبای لێ هاوردە دەکات، ئەمەش وای لێدەکات نەتوانێت خۆبژێوی مسۆگەر بکات و پێداویستییەکانی دانیشتووانەکەی کە 45 ملیۆن کەس زیاترە پڕ بكاتەوە